कांंग्रेसमा अझै कचिङगल, कोइराला पक्षलाई के होला र देउवा पक्षलाई के गर्ने भन्नेमै चिन्ता

१४ असोज, काठमाडौं । समय घर्किँदै गइरहेका बेला नेपाली कांग्रेसभित्र विवाद मिलाउने मूलबिन्दु अझै भेटिएको छैन् । असन्तुष्ट पक्ष भनिएको कोइराला समूहले उठाएका माग सम्बोधन गर्न तयार भएका पार्टी सभापति शेरबहादुर देउवाले अझै अन्तिम निर्णय गर्न नसक्दा आगामी निर्वाचनका लागि उम्मेदवार चयनमासमेत अन्योलताबढेको छ ।

बुधबारको वार्तापछि बिहीबारदेखि कांग्रेसमा समानुपातिकतर्फको बन्दसूचीमा सहमति खोज्ने प्रयास जारी छ । बिहीबारको बैठकमा समानुपातिकतर्फको बन्दसूची परिवर्तन गर्न संस्थापन पक्ष सहमत भएको थियो । पार्टी पदाधिकारीको बैठकमा समानुपातिक सूचीमा शेखर कोइराला पक्षका केही नेतालाई राख्ने सहमतिसमेत भइसकेको नेताहरुको भनाइ छ ।

प्रदेशको भने अझै टुंगो लागेको छैन । कांग्रेस प्रवक्ता डा. प्रकाशशरण महतका अनुसार आजसम्म प्रदेशतर्फको बन्दसूचीमा पनि सहमति जुट्नेछ । कोइराला समूहबाट कतिजना थप्ने भन्नेबारे संस्थापन पक्षले आज स्पष्ट पार्ने भएको छ । शेखर पक्षकले भने ४० प्रतिशत सिट पाउनुपर्ने अडान कायमै राखेको छ ।

निर्वाचन आयोगमा बुझाइएको समानुपातिक बन्दसूचीमा संस्थापन पक्षले एक्लौटी गरेको आरोप लगाउँदै शेखर पक्षले विद्रोहको चेतावनी दिएपछि संस्थापन पक्ष छलफलमा जुटेको हो ।

संस्थापन पक्षविरुद्ध आन्दोलन गर्दै आएको यो समूहले समानुपातिकतर्फको बन्दसूचीको वरीयतामा सुनिश्चितता र प्रतिशतमा लचकता अपाउने नीति अंगीकार गरेको छ । सूची हेरफेर गर्दा आफ्ना मान्छेको वरीयता अगाडि राख्न सके समानुपातिक सांसद बन्ने सम्भावना बढ्ने भएकाले इतर समूहले यसलाई प्राथमिकतामा राखेको हो ।