सीट बाँडफाँडको टुंगो लगाउन आज पनि सत्ता गठबन्धनको बैठक, बिहीबारको निर्णयमा पुनर्विचार गर्नुपर्ने नेपालको माग

१४ असोज, काठमाडौं । दलहरुले लिने सीट संख्याको टुंगो लगाउन सत्ता गठबन्धनको बैठक आज पनि बस्दैछ । सीट बाँडफाँटको अन्तिम टुंगो लगाउने गरी बैठक बस्न लागेको बताइएको छ । प्रधानमन्त्री निवास बालुवाटारमा बस्ने बैठकले आगामी प्रतिनिधिसभा र प्रदेशसभाको लागि उमेदवारहरुको तय गर्ने भएको छ ।

पाँचदलबीच फरक फरक दाबी आएपछि सीट बाँडफाँटको टुंगो लामो समयदेखि लाग्न सकेको छैन । आजको बैठकले त्यसलाई टुंग्याउने नेताहरुको भनाइ छ । बिहीबारको बैठकले सीट बाँडफाँटको अन्तिम टुंगो लगाउन नसकेपछि आज पुनः बैठक बस्न लागेको हो । आजको बैठकले कसले कति सीट लिने टुंगो लगाउने दाबी गरिएको छ ।

हिजोको बैठकमा एकीकृत समाजवादीका अध्यक्ष माधव नेपाल आफ्नो पार्टीलाई प्रस्ताव गरिएको सीटमा चित्त नबुझेपछि उनी बैठकको बीचमै उठेर हिँडेका थिए । एकीकृत समाजवादीले १६ सीट पाउने भनिएपछि उनी बीचमै बैठक छाडेर हिँडेका थिए । उनले याे निर्णय सच्याउनु पर्ने माग गरिरहेका छन् ।

हालसम्मको सहमतिअनुसार माओवादी केन्द्रले ४४ सीट पाउने भनिएको छ । नेपाली कांग्रेसले ८४ सीट लिने सहमति भएको खबर बाहिरिएपछि कांग्रेसभित्र पनि असन्तुष्टि चुलिएको छ । नेपाली कांग्रेसका एक शीर्ष नेताका अनुसार सप्तरी, पर्सा र कास्कीमा सहमति जुट्न अझै बाँकी छ । केही निर्वाचन क्षेत्रमा दोहोरो दाबेदारी रहेका कारण सहमति जुट्न सकेको छैन ।