‘म कांग्रेसलाई मात्र भोट माग्छु, गठबन्धनलाई माग्दिन’: डा.पोखरेल

१५ असोज, काठमाडौं । नेपाली कांग्रेसका नेता एवं केन्द्रीय सदस्य डा. गोविन्द पोखरेलले आफुले जिल्लामा गठबन्धनका उम्मेदवारलाई भोट नमाग्ने घोषणा गरेका छन् । गृह जिल्ला प्युठानबाट प्रतिनिधिसभा सदस्यको उम्मेदवारका लागि सिफारिस भएका नेता पोखरेलले सामाजिक सञ्जालमार्फत आफूले कांग्रेसका उम्मेदवारका लागि मात्रै भोट माग्ने बताएका हुन् ।

सत्ता गठबन्धनका दलहरूबीच प्युठानमा प्रतिनिधिसभातर्फको सीट राष्ट्रिय जनमोर्चालाई दिने सहमति भएको खबर सार्वजनिक भएपछि पोखरेलको यस्तो प्रतिक्रिया आएको हो । यस क्षेत्रमा टिकट दाबी गरेका कांग्रेस नेता पोखरेलले राष्ट्रिय जनमोर्चाले टिकट पाए आफूले गठबन्धनको पक्षमा भोट नमाग्ने घोषणा गरेका हुन् ।

२०७४ को चुनावमा बाम गठबन्धनकी उम्मेदवार दुर्गा पौडेलसँग पराजित भएका पोखरेलले अहिले फेरि उनै पौडेल गठबन्धनको उम्मेदवार हुने चर्चाले आफू उम्मेदवार हुन पाउनेमा प्रश्नचिह्न खडा भएको उल्लेख गरेका छन् । ‘यदि बाहिर आएका गठबन्धनका समाचार सही भएमा म प्युठानी जनताका बीच रुख चिह्नमा पार्टी र पार्टीका उम्मेदवारलाई मात्र मत माग्न आउनेछु, नेपाली कांग्रेसका उम्मेदवारलाई विजयी बनाउन विनम्र अनुरोध गर्दछु,’ डा. पोखरेलले सामाजिक सञ्जाल फेसबुकमा लेखेका छन् ।

अघिल्लो चुनावमा ६४ वटा वडा मध्ये ६३ वडामा पुगेको उल्लेख गर्दै पोखरेलले यसपटक पनि आफूलाई प्यूठानमा संघीय उम्मेदवार होस् भन्ने धेरै शुभेच्छुक र साथीहरुको चाहना रहेको पोखरेलले लेखेका छन् । ‘शुभेच्छुकहरुको प्रस्तावप्रति पार्टीको केन्द्रीय सदस्य भएकोले गम्भीर छु तर प्रस्तावलाई सकारात्मकरुपले लिएर उपायहरु खोज्दै छु,’ उनले लेखेका छन् ।

स्थानीय तहको नतिजा अनुसार प्यूठानमा एमालेले ३९ हजार ८७७, कांग्रेसले २१ हजार ५४६, माओवादीले १७ हजार १६३, जनमोर्चाले १३ हजार ६१२ र समाजवादीले एक हजार ४१७ मत पाएका छन् । पोखरेल पार्टीभित्र शेखर कोइराला पक्षका हुन् ।

उनको यो भनाइले पनि कोइराला समूहका माग पुरा गराउन सभापति शेरबहादुर देउवाले कदम नचाले गठबन्धनलाई चुनाव जित्न कठीन हुने देखिएको छ । स्थानीय चुनावपछि एमालेले विभिन्न पार्टीबाट पाँच हजार जनालाई एमालेमा प्रवेश गराएको दाबी गरेको छ । प्युठानमा एमालेले एमाले अध्यक्ष केपी शर्मा ओली प्रधानमन्त्री हुँदा प्रेस सल्लाहकार रहेका जिल्ला इन्चार्ज सूर्य थापालाई सर्वसम्मत उम्मेदवार सिफारिस गरेको छ ।