गठबन्धनका उम्मेदवारहरुको जीत सुनिश्चित छ–सञ्जयकुमार गौतम उम्मेदवार बर्दिया क्षेत्र नं. १

सञ्जयकुमार गौतम बर्दियाली जनता माँझ मात्र होइन राष्ट्रिय राजनीतिमै चर्चित नाम हो । खासगरी ०७४ सालको आम निर्वाचनमा राष्ट्रिय अन्तर्राष्ट्रिय रुपमै चर्चाको शिखरमा रहेका एमाले नेता बामदेव गौतमलाई पराजित गरेपछि सञ्जय गौतमको चर्चा राष्ट्रिय राजनीतिमा बहसको विषय नै भएको थियो । एमाले र माओवादीबीच गठबन्धनसहित भएको त्यो चुनावमा बामदेव जस्तो पूर्व उपप्रधानमन्त्री एवं शक्तिशाली गृहमन्त्रीलाई पराजित गर्नु चानेचुने कुरा थिएन ।

हाल नेपाली कांग्रेसको केन्द्रीय सदस्य रहेका गौतम आसन्न मंसिर ४ गते हुने आम निर्वाचनमा बर्दिया क्षेत्र नं. १ बाट गठबन्धनका तर्फबाट प्रतिनिधिसभाका लागि उम्मेदवार छन् । ०७४ को आम निर्वाचनमा बर्दिया–१ बाट प्रत्यक्ष निर्वाचित सञ्जय गौतमले देउवा सरकारको पालामा सिँचाइ मन्त्रालयको जिम्मेवारी सम्हालेका थिए । जिल्लामा उनी राम्रो पकड भएका नेता मानिने उनी २ पटक जिल्ला पार्टी सभापति पनि भईसकेका छन् । सांसद भएको पहिलोपटक मै मन्त्री बन्न समेत सफल उनी पार्टीभित्र कुशल संगठक र नेतृत्वदायी भूमिकामा अब्बल मानिन्छन् ।

राजनीतिशास्त्रमा स्नातक तहसम्मको अध्ययन गरेका सञ्जय गौतमको जन्म बि.सं. २०२० साल फाल्गुन २ गते नेपालगञ्जको घरबारी टोलमा भएको हो भने हाल बर्दिया जिल्लाको गुलरिया–६ का स्थायी बासिन्दा हुन् । उनका बाबुको नाम किशोर कुमार गौतम र आमाको नाम स्व. रक्षा गौतम हो । उनकी श्रीमतीको नाम सावित्री गौतम हो ।

गौतमले २०३६–०३७ सालको चर्चित बिद्यार्थी आन्दोलनसँगै नेपाल विद्यार्थी संघबाट राजनीतिक यात्राको पा्ररम्भ गरेका थिए । सो आन्दोलनका बेला तीन महिनासम्म भद्रगोल जेलमा बिताएका २०४९ सालमा वडाध्यक्ष भएर जिल्ला विकास समितिको उपसभापतिमा भीडेका थिए ।

पार्टीको गाउँ सचिव, क्षेत्रीय सचिव, जिल्लाको सह–सचिव, सचिव हुँदै गौतम पार्टीको दुईपटक जिल्ला सभापति समेत भईसकेका छन् । पार्टी विभाजनका बेला तत्कालीन संस्थापन पक्षमा रहेर सभापति भएका गौतम एकतापछि सर्वसम्मतिले सभापति भएका थिए । २०६२-०६३ को आन्दोलनका क्रममा पनि तीन महिना जेल परेका गौतम २०६४ मा सम्पन्न संविधानसभा निर्वाचनमा उम्मेदवारबनेका थिए तर पराजित भए । २०७० सालमा संविधानसभा सदस्यबनेका उनी गरिब, निमुखा, उत्पीडित तथा आवाजबिहीनहरुको आवाज बुलन्द गर्ने उनी असल नेता र समाजसेवीका रुपमा परिचति छन् । उनै गौतमसँग आमनिर्वाचनमा केन्द्रित रहेर नेपालबहसका कालिका महतले गरेको कुराकानीको सम्पादित अंशः

बर्दियामा चुनाव प्रचारप्रसार कत्तिको अगाडि बढेको छ ?

यतिबेला उम्मेदवारी दर्तापछि जिल्लाका नेता, कार्यकर्ता तथा साथीहरुसँग छलफल र सरसल्लाह गर्दैछु । गठबन्धनमा सामेल दलका नेता, कार्यकर्तासँग पनि भेटघाट गर्दैछु । भेटमा उहाँहरुसँग चुनावमा एकढिक्का भएर कसरी अगाडि बढ्ने भन्ने बारेमा गहन छलफल चलिरहेको छ । कांग्रेसका अग्रज नेता, कार्यकर्ता र गठबन्धनमा सामेल दलका नेता कार्यकर्ता बहस, छलफल र भेटवार्ता गरिरहेको छु । त्यसमा चुनावमा कसरी जाने, चुनाव परिचालन कमिटी कसरी बनाउने र सबैलाई मिलाएर कसरी अगाडि बढ्ने भन्ने विषयमा केन्द्रित रहेर छलफल जारी छ ।

यतिबेला नेपाली कांग्रेसभित्र पनि टिकटको विषयलाई लिएर असन्तुष्टिहरु छन् त्यहाँको अवस्था कस्तो छ ?

नेपाली कांग्रेस पुरानो र ठूलो लोकतान्त्रिक पार्टी हो । यसमा फरक विचार, बहस, छलफलहरु हुन्छन् । यसभित्रका नेताहरुबीच विभिन्न विचार र बहसहरु हुन्छन् । धेरै नेता, कार्यकर्ता भएको पार्टीमा कसैले टिकट पाउँछन् कसैले पाउँदैनन् । पाउने एउटा हुन्छ, आकांक्षी धेरै हुन्छन् । आशा गरेको ठाउँमा नपाउँदा असन्तुष्टि हुन्छ । त्यसपछि ती असन्तुष्टिहरु विस्तारै हराउँदै जान्छन् । बर्दिया कांग्रेसभित्र खासै असन्तुष्टि र मनमुटाव छैन । त्यसकारण हामी सबै एकढिक्का भएर जाने छौं । कांग्रेसभित्र खासै समस्या छैन ।

गठबन्धन कत्तिको अनुशासित र कसिलो भएर चुनावसम्म जाने जस्तो लाग्छ ?

यो गठबन्धनमा सबैभन्दा ठूलो समस्या भनेको भोट हाल्नका लागि चुनाव चिन्हको हो । किनभने रुखमा भोट हालिरहेका मान्छहरुले हसियाँ हथौडामा हाल्नुपर्ने तथा हसियाँ हथौडामा हालिरहेका मान्छेहरुले रुखमा हाल्नुपर्ने । यो चाहीं ठूलो टेक्निकल समस्या छ । तर, हामी गठबन्धनमा सामेल दलहरु एकदमै प्रतिबद्ध छौं । कार्यकर्ताहरुलाई पनि त्यसैगरी परिचालन गर्ने योजनामा जुटेका छौं ।

त्यसको लागि कार्यकर्तामार्फत जनतालाई पनि सूसुचित गरिरहेका छौं । हाम्रा नेता, कार्यकर्ताहरु पनि गठबन्धनका नेता नै हाम्रो उम्मेदवार हुन् भनेर लागिपरेको अवस्था छ । त्यसको लागि मानसिक रुपमा नै कन्भिन्स भएको अवस्था छ । त्यसकारण बर्दिया जिल्लामा यो गठबन्धनबाट हामीले लक्षित उपलब्धि हासिल गर्दछौं । त्यसको लागि साथीहरुमा खासै समस्या छैन । यहाँ गठबन्धनका उम्मेदवारहरुको जीत सुनिश्चित छ । हाम्रा साथीहरुबीच मैले त्यति ठूलो समस्या देखेको छैन् ।

बर्दिया निर्वाचन क्षेत्र नं. १ का जनताले सञ्जय गौतमलाई नै भोट दिनुपर्ने कारण के ?

मैले बर्दियाका जनताको जीवनस्तर परिवर्तनका लागि धेरै काम गरेको छु । मैले जनताको जीवनस्तर परिवर्तनलाई आफ्नो बलबुताले भ्याएसम्म अगाडि बढाउने काम गरेको छु । त्यसको अनुभूति यहाँका जनतालाई दिलाएको छु । हरेक कालखण्डमा यस क्षेत्रका जनताको जीवनस्तर परिवर्तनको महत्वपूर्ण भूमिका निर्वाह गरेको छु । मेरो कार्यकालमा बर्दिया जिल्लाले राजनीति परिवर्तनको अनुभूति गरेका छन् । त्यसकारण यहाँका जनताले जसरी मलाई निर्माण गरे, त्यसमा उनीहरु पनि खुशी छन् भन्ने मलाई लाग्छ ।

यसरी तपाईंले चुनाव जितेर त्यस ठाउँमा नेपाली कांग्रेसको संगठन स्थापित गर्नुभयो, यसपाली त्यो शाख कायम राख्न सक्नुहुन्छ ?

मज्जाले सक्छु, त्यसमा दुईमतै छैन । जसरी मैले अघिल्लो आमनिर्वाचनमा यहाँका जनताबाट साथ, सहयोग र समर्थन पाएको थिएँ । त्यसको गुन मैले तिरेको जस्तो लाग्छ । त्यसको मूल्यांकन जनताले पनि गरेका छन् । त्यो साथ, सहयोग र समर्थन यसपटकको निर्वाचनमा पनि पाउँछु भन्नेमा विश्वस्त छु । जसरी मलाई नेपाली कांग्रेसले विश्वास गरेर उम्मेदवार बनाएको छ । त्यसैगरी बर्दिया जिल्लामा कांग्रेसको दारिलो अनि भरपर्दो पार्टी बनाएर स्थापित गर्ने प्रतिबद्धता जाहेर गर्दछु । त्यसको लागि कांग्रेस नेता, कार्यकर्ता र गठबन्धनका साथीहरुको साथ, सहयोग र सर्मथन अपरिहार्य हुनेछ ।

परिवर्तनका कुरा गर्नुभयो, दलहरुप्रति खासै आकर्षण छैन, जनताबाट कस्तो आश्वासन पाउनुभएको छ त ?

यतिबेला आमजनताका बीचमा हामी राजनीति दलहरुप्रति जनताको वितृष्णा छ, त्यो कुरा साँचो हो । तर देशभरमा नेपाली कांग्रेस, नेकपा एमाले र नेकपा माओवादीजस्ता राष्ट्रिय पार्टीको विकल्प पनि छैन । कतिपय विषयमा ती कुरा खड्किएका पनि छन् । कतिपय कुराहरुमा हामीले पनि आफूलाई सुधार गर्नुपर्ने आवश्यकता देखिन्छ । हामीले जनताका बीचमा शान्तिसुरक्षा, आर्थिक सुशासन र राजनीतिक स्थिरता दिन्छौं भनेर जसरी वचनवद्धता गरेका छौं ।

यसपाली जनताले यो संविधान निर्माणपछि जुन किसिमको घटनाक्रम देशमा निर्माण भयो । नेपाल कम्युनिस्ट पार्टीको नाममा दुई तिहाई हाराहारीको सरकार बनेर पनि मुलुकमा राजनीतिक, सामाजिक र आर्थिक स्थिरता आउन सकेन । त्यसकारण अब उनीहरु नेपाली कांग्रेसको नेतृत्वमा निर्मित सरकारले राजनीतिक स्थिरता दिन्छ । देशमा शान्तिसुरक्षा र अमनचयन र आर्थिक उन्नति हुन्छ भनेर जनताले विश्वास गरेका छन् । र, संस्थागत रुपले हामीले निर्माण गरेको संविधानलाई कार्यान्वयन गर्ने पक्षमा नेपाली कांग्रेसको नेतृत्वमा यो अभियान सफल हुन्छ र मुलुकले एउटा स्थायित्वको बाटो लिन्छ भन्नेमा जनता विश्वस्त छन् । त्यसमा जनता दुईमत छन् जस्तो मलाई लाग्दैन ।

गठबन्धन नै गरेर चुनावमा जानुपर्ने राष्ट्रिय आवश्यकता हो कि यसमा संलग्न पार्टीहरु चुनावसँग डराएर हो ?

यो गठबन्धनलाई एउटा चुनाव जित्न, सरकारमा जान र प्रधानमन्त्री, मन्त्री बन्नका लागि मात्रै जोडेर हेर्न मिल्दैन । यसलाई नेपाली कांग्रेसले गठबन्धन गरेर चुनावमा जाने भनेर संस्थागत निर्णय गरेको छ । हामीहरु पनि त्यहीं अनुरुप अगाडि बढिसकेका छौं । त्यसैले हाम्रो गठबन्धन अहिलेको अपरिहार्य आवश्यकता नै हो भन्ने ठान्नु्पर्छ ।