मुक्तिनाथ विकास बैंकको शेयर आम्दानी प्रभावित

११ कात्तिक, काठमाडौं । चालु आर्थिक वर्षको पहिलो त्रैमाससम्म आइपुग्दा मुक्तिनाथ विकास बैंकको खुद नाफासँगै प्रति शेयर आम्दानी प्रभावित भएको छ । एक वर्षको अवधिमा बैंकको खुद नाफा ११.०५ प्रतिशतले घटेर ३० करोड ७४ लाख १५ हजार रुपैयाँमा सीमित भएको छ ।

अघिल्लो वर्षको यसैअवधिमा यसले ३४ करोड ५५ लाख ८७ हजार रुपैयाँ नाफा आर्जन गरेको थियो । एक वर्षको अवधिमा बैंकको इम्पेरिमेन्ट चार्ज बढेकाले र सञ्चालन नाफा घटेकाले खुद नाफा प्रभावित भएको हो ।

यसअवधिसम्म सञ्चालन नाफा ११.०५ प्रतिशत ले घटेर ४३ करोड ९१ लाख रुपैयाँमा सीमित भएको छ । गत वर्ष सो नाफा ४९ करोड ३६ लाख रुपैयाँ रहेको थियो । गत वर्ष १७ करोड ४८ लाख रुपैयाँ रहेको इम्पेरिमेन्ट चार्ज यो वर्ष बढेर २५ करोड १ लाख रुपैयाँ पुगेको छ ।

यता, खुद ब्याज आम्दानी भने २२.२४ प्रतिशतले बढेर १ अर्ब २ करोड ३९ लाख रुपैयाँ पुगेको छ ।बैंकको वितरणयोग्य नाफा ८१ करोड ४७ लाख रुपैयाँ रहेको छ । यसको जगेडा कोषमा १ अर्ब ९५ करोड रुपैयाँ जम्मा भएको छ । गत वर्षको चौथो त्रैमासमा बैंकको जगेडा कोषमा १ अर्ब ६२ करोड २१ लाख रुपैयाँ रहेको थियो । यसको चुक्ता पुँजी ५ अर्ब ६५ करोड ७१ लाख ८० हजार रुपैयाँ छ ।

असोज मसान्तसम्म आइपुग्दा बैंकको प्रतिशेयर आम्दानी २ रुपैयाँ ७० पैसाले घटेर २१ रुपैयाँ ७४ पैसा कायम भएको छ । गत वर्षको पहिलो त्रैमासमा यसको प्रतिशेयर आम्दानी २४ रुपैयाँ ४४ पैसा रहेको थियो । कम्पनीको प्रतिशेयर नेटवर्थ १४८ रुपैयाँ ५८ पैसा छ ।