छिर्के दाउबाट प्रधानमन्त्री बन्ने प्रचण्डको अभिव्यक्तिमा महतको काउण्टर

१७ कात्तिक, काठमाडौं । एमालेले भावी प्रधानमन्त्री केपी ओलीलाई अघि सारेको बेला गठबन्धन दलहरुले भने आ-आफ्ना अध्यक्षलाई भावी प्रधानमन्त्रीको रुपमा अघि सारेका छन् । गोरखा –२ बाट निर्वाचन लडिरहेका पूर्व प्रधानमन्त्री प्रचण्ड नै भावी प्रधानमन्त्री भएको प्रचार भैरहेको छ । डा. बाबुराम भट्टराईले गोरखा –२ का जनाताले भावी प्रधानमन्त्रीलाई मतदान गर्ने बताएका छन् । उनले गोरखाका जनता भाग्यमानी भएको भन्दै प्रचण्डलाई भावी प्रधानमन्त्रीको रुपमा अघि सारेका छन् । प्रचण्डले पनि आफूले देशको नेतृत्व गर्ने बताइरहेका छन् ।

तर प्रधानमन्त्री शेरबहादुर देउवाका विश्वासपात्रमध्येका एक प्रकाशशरण महतले कात्तिक १६ गते बुटवल पुगेर आफ्नो पार्टी सभापतिलाई आगामी प्रधानमन्त्री बन्नबाट कसैले रोक्न नसक्ने बताएपछि माओवादीभित्र अन्यौलता छाएको छ । ‘कांग्रेसको नेतृत्वमा सरकार बन्छ। शेरबहादुरजी प्रधानमन्त्री बन्ने कुरामा कुनै दुईमत छैन । यसलाई भट्याइरहनु आवश्यक छैन, नेपाली कांग्रेसका प्रवक्ता समेत रहेका महतले भने, ‘कांग्रेसभित्र पनि उहाँलाई प्रधानमन्त्री बन्नबाट कसैले रोक्न सक्दैन ।’

प्रचण्डले गठबन्धनबाट पहिलो प्रधानमन्त्री बन्ने आफ्नो चाहना रहेको बताएका थिए । तर यो विषयमा कांग्रेस मौन रहेको छ । कांग्रेस ठूलो पार्टी भएकै कारण स्वाभाविक रुमा उसले सरकारको नेतृत्व गर्नुपर्ने भएपनि माओवादीले चुनाव अघिबाटै आफ्नो दलको अध्यक्ष भावी प्रधानमन्त्री बन्ने भन्दै प्रचार गर्न थालेको छ । नेकपा (माओवादी केन्द्र) का अध्यक्ष पुष्पकमल दाहालले घोषणापत्रमै लेखेर प्रधानमन्त्री पदमा दावेदारी प्रस्तुत गरे लगत्तै आएको महतको यो धारणा अर्थपूर्ण छ । यो भनाई पछि महतले कांग्रेसको ‘औपचारिक’ धारणा सार्वजनिक गरेको कतिपयको विश्लेषण छ ।

कात्तिक १४ गते दाहालले सार्वजनिक गरेको घोषणापत्रमा आफू प्रधानमन्त्री बन्न पाउनुपर्ने उल्लेख छ । ‘अध्यक्ष कमरेड प्रचण्डको नेतृत्वको नेकपा (माओवादी केन्द्र) बाट मात्र यतिबेला पनि राष्ट्रको नेतृत्व, निकास र विकास सम्भव छ’ घोषणापत्र (पृष्ठ १०) मा भनिएको छ । यो वाक्यांश दाहालको प्रधानमन्त्री बन्ने अति महत्वाकांक्षाबाट आएको बुझ्न गाह्रो छैन । नेता महतको भनाइ दाहालको महत्त्वाकांक्षा कांग्रेसले सजिलै पूरा गर्न दिंदैन भन्ने सन्देश पनि हो । सरकारको नेतृत्व सबैभन्दा ठूलो दलले गर्नु संसदीय व्यवस्थाको आधारभूत मान्यता हो । ठूलो दल नभए दोस्रो ठूलो दलले सरकारको नेतृत्व गर्छ । चुनाव जित्न नसकेको पार्टीका नेतालाई प्रधानमन्त्री बनाउनु जनमतको अपमान हो ।

डडेल्धुराबाट प्रतिनिधिसभा सदस्यमा उम्मेदवारी दिएका कांग्रेस सभापति देउवा चुनावमा पराजित भएमा चाहिं दाहालको प्रधानमन्त्री बन्ने बाटो खुल्न सक्ने देखिन्छ । देउवा पराजित हुँदा माओवादी नेतृत्वमा आरजु राणा देउवाको अगुवाइमा कांग्रेस सरकारमा जान सक्ने कांग्रेसका एक सहमहामन्त्री बताउँछन् ।

अहिलेसम्मको विश्लेषणमा १०० भन्दा बढी सीट जित्ने र एमाले दोस्रो ठूलो दल बन्ने अवस्थामा कांग्रेसले सहजै माओवादीलाई प्रधानमन्त्री दिन्छ भन्ने विश्वासिलो आधार नभएको कांग्रेस नेताहरुले जनाएका छन् । गठबन्धनको तर्फबाट नेपाली कांग्रेसले प्रत्यक्षतर्फबाट सबैभन्दा बढी ९१ सीटमा उम्मेदवारी दिएको छ । माओवादीले ४० सीट माथि मात्रै उम्मेदवारी दिएको अवस्थामा छिर्के दाउबाट प्रधानमन्त्री बन्ने कोशिस गरिरहेको अवस्थामा माओवादीको सीट कति आउछ भन्ने प्रष्ट छैन ।