सुदूरपश्चिम प्रदेशसभामा अधिकांश नयाँ अनुहार, काे कहाँबाट विजयी ?

१४ मंसिर, धनगढी । सुदूरपश्चिम प्रदेशसभाका ३२ निर्वाचन क्षेत्रमध्ये ३० क्षेत्रको प्रत्यक्ष निर्वाचनतर्फको नतिजा आइसकेको छ। प्रदेशसभामा यसपटकको निर्वाचनबाट अधिकांश नयाँ अनुहार आएका छन् ।

कांग्रेसबाट प्रदेशसभाको प्रत्यक्षमा निर्वाचित कैलालीका प्रकाशबहादुर देउवा, प्रकाश बम र कमलबहादुर शाह, कञ्चनपुरबाट दिवानसिंह बिष्ट, बहादुरसिंह थापा र बेलबहादुर रानामगर, अछामबाट मेघराज खड्का र मानबहादुर रावल, बझाङबाट पृथ्वीबहादुर सिंह, बैतडीबाट शिवराज भट्ट, दार्चुलाबाट विक्रमसिंह धामीसहित ११ जना नयाँ हुन् ।

यस्तै, माओवादी केन्द्रका कैलालीबाट रमेश धामी, डडेलधुराबाट खगराज भट्ट, डोटबिाट शिवसिंह ओली, कञ्चनपुरबाट ओमविक्रम भाट,बझाँबाट भीम भण्डारी र अछामबाट झपटबहादुर साउद नयाँ अनुहार हुन् ।

यस्तै, नागरिक उन्मुक्ति पार्टीतर्फ कैलालीबाट प्रदेशसभा सदस्यमा रामेश्वर चौधरी, कैलाश चौधरी, लक्ष्मणकिशोर चौधरी, घनश्याम चौधरी र खुशीराम चौधरीसहित ५ नयाँ अनुहार हुन् । एमालेबाट प्रदेशसभा सदस्यमा निर्वाचित हुनेमा कञ्चनपुरबाट वीरबहादुर थापा, बैतडीबाट सुरेन्द्र पाल र डोटीबाट चक्र मल्ल नयाँ अनुहार हुन् ।

स्वतन्त्रबाट प्रदेशसभा सदस्यमा निर्वाचित डडेल्धुराका डा. तारा जोशी पनि नयाँ हुन् । प्रदेशसभामा ५३ सदस्य रहेका छन् । प्रत्यक्षतर्फको बाजुराबाट २ सदस्यको परिणाम आउन बाँकी छ । यो प्रदेशको समानुपातिकको २१ सदस्यको नतिजा आउन बाँकी छ ।

मङ्सिर ४ मा सम्पन्न निर्वाचनको प्रत्यक्षतर्फ सुदूरपश्चिम प्रदेशसभाका निवर्तमान दुई सदस्य प्रतिनिधिसभामा र चार सदस्य प्रदेशसभा सदस्यमा पुनःनिर्वाचित भएका छन् । प्रदेशसभाका निवर्तमान ४ सदस्य भने यसपटकको चुनावमा पराजित भए।