कोरिया जाने कामदारको भिसा शुल्कमा वृद्धि

१५ पुष, काठमाडौं । दक्षिण कोरियामा रोजगारमा भाषा परीक्षा (ईपीएस) प्रणालीमार्फत जानेहरुका लागि शुल्क बढाएको छ । नेपालस्थित कोरियन दूतावासले १ जनवरी २०२३ देखि लागू हुने गरी भिसा शुल्क बढाएको हो ।

अहिलेसम्म दूतावासले ७ हजार २०० रूपैयाँ भिसा शुल्क लिने गरेको छ । अबदेखि उक्त शुल्कमा ६०० रूपैयाँ वृद्धि गरी ७ हजार ८०० पुर्‍याइएको छ ।

भिसा जारी गर्न गर्न अघि आवश्यक पर्ने प्रक्रिया पुरा गर्न (सीसीभीआई)को लागि स्वयं व्यक्ति नै ईपीएस कार्यालयमा उपस्थित भई फाराम बुझाउनुपर्ने व्यवस्था रहेको छ । अबदेखि उक्त फाराम भर्ने व्यक्तिहरूले भिसा शुल्क वापत ७ हजार ८०० रूपैँया बुझाउनुपर्ने ईपीएस कोरिया शाखाले जनाएको छ ।

वृद्धि शुल्क यसअघि नै सीसीभीआई फारम बुझाई सकेका तथा भिसा जारी हुन नसकेका व्यक्तिहरूमा समेत लागू हुने शाखाले जनाएको छ । यसअघि सीसीभीआई फारम बुझाई सकेका व्यक्तिहरूले समेत भिसा जारी हुनका लागि नेपालस्थित कोरियन राजदूतावासमा सन् २०२३ जनवरी १ पछि मात्रै जाने भएकाले थप ६०० रूपैयाँ बुझाउन कार्यालयले भनेको छ ।

भाषा परीक्षा पास गरेर बसेका नेपाली कामदार देशभित्र हजारौंको संख्यामा छन् । कोरियाले कामदार लैजाने प्रक्रियामा पछिल्लो पटक विलम्ब गर्दै आएको छ । श्रीलंका, पाकिस्तान, बंगलादेश, फिलिपिन्स लगायत मुलुकबाट कोरियाले आवश्यक क्षेत्रमा भाषामा पोख्त कामदारलाई लैजाने गरेको छ ।