सशस्त्रका हामिकले परिचालन गरेका सबै घुमुवाहरुको काज सरुवा

२२ पुष, काठमाडौं । सशस्त्र प्रहरीका कार्यालय प्रमुखहरुले आफूखुशी परिचालन गरेका घमुवाहरुलाई काज सरुवा गरिएको छ । विहिबार सशस्त्र प्रहरी मूख्यालयले सादा पोसाकमा परिचालन गरिएका सबैको काज सरुवा गरेको हो ।

काज सरुवा हुनेमा सशस्त्र प्रहरी नायब निरीक्षक ५ जना, सशस्त्र प्रहरी सहायक निरीक्षक ७ जना, वरिष्ठ हवलदार १८ जना, कामु वरिष्ठ हवलदार ३ जना, हवलदार २० जना, सहायक हवलदार ६३ जना र सिपाही १८ जना गरी १३४ जना रहेका छन् ।

काज सरुवा भएका १३४ मध्ये मधेश प्रदेशबाट विभिन्न पदका ३६ जना रहेका छन् । सशस्त्र प्रहरी बलका महानिरीक्षक राजु अर्यालले गत जेठ ६ मा मातहतका कुनै पनि कार्यालयले सादा पोसाकमा घुमुवा खटाएको भए तुरुन्त फिर्ता गर्न निर्देशन दिएका थिए । महानिरीक्षक अर्यालले निर्देशन दिए पनि केही कार्यालयले आवश्यकता छ भन्दै सादा पोसाकमा सूचना संकलन गर्न प्रहरी परिचालन गरेका थिए ।

सादा पोसाकमा सशस्त्र प्रहरीको कुनै पनि कर्मचारी नखटाउन दिइएको निर्देशनलाई मातहतका केही कार्यालयले फरक तरिकाले बुझेर अटेर गरेको गुनासो बढेको थियो । एकै दिनमा देशभरका १३४ सादा पोसाकका सशस्त्र प्रहरी कर्मचारीको काज सरुवासँगै तिन दिनभित्र सरुवा भएको ठाउँमा हाजिर गर्न निर्देशन भएपछि यतिबेला कार्यालय प्रमुखहरुले उनीहरुलाई रोक्न मूख्यालयमा दबाब दिइरहेका छन् । सशस्त्र प्रहरी बलले एक साथ १३४ सादा पोसाकको काज सरुवा गरेपछि कार्यालय प्रमुखका विश्वासपात्रका रुपमा रहेका र आर्थिक विवादित रहेकाहरुलाई समस्या परेको छ ।