९० अर्बले सञ्चित कोष ऋणात्मक भएपछि २४ अर्बका योजना स्थगन गर्ने अर्थको निर्णय

१७ माघ, काठमाडौं । बाह्य र आन्तरिक कारणले ९० अर्ब हाराहारीमा सञ्चित कोष ऋणात्मक भएको भन्दै वित्तीय सन्तुलन कायम राख्न अर्थ मन्त्रालयले खर्च कटौती योजना अगाडी सारेको छ । मन्त्रालयका अनुसार नेपाली मुद्रा अमेरिकी डलरसँग कमजोर हुँदा वैदेशिक ऋणको साँवा र ब्याज भुक्तानीमा समस्या आएको छ । ऋण तिर्न बजेटमा विनियोजन गरिएको रकम पर्याप्त नहुँदा सञ्चित कोष ९० अर्बले ऋणात्मक छ ।

अर्थ मन्त्रालयले यससम्बन्धी १४ वाट निर्णय सार्वजनिक गर्दै खर्च कटौतीको निर्णय कार्यान्वयन गर्दा करिव साढे २४ अर्बका योजना रोकिने पनि जनाएको छ । जसमा १० अर्ब ५० करोड खर्च कटौती अन्तर्गत र खर्च रोक्का अन्तर्गत १४ अर्ब बराबरका कार्यक्रमहरू प्रभावित हुने मन्त्रालयले जनाएको छ ।

मन्त्रालयले सरकारको वित्त सन्तुलन कायम राख्न खर्च कटौती र रोक्का गर्ने निर्णय गरेको हो । कोरोना महामारी, रुस–युक्रेन युद्धसहितका विभिन्न कारणले अर्थतन्त्रमा चाप परेको निष्कर्ष निकाल्दै अर्थले खर्च कटौती गरेर मितव्ययिता अपनाउन १४ बुँदे निर्णय पनि सार्वजनिक गरेको छ ।

संघीय सरकारको सबै मन्त्रालय र निकायको स्वीकृत बजेटको इन्धन, मर्मत–सम्भार, मसलन्द तथा कार्यालय सामग्री, पत्रपत्रिका, छपाइ तथा सूचना प्रकाशन, सेवा र परामर्श, सूचना प्रणाली तथा सफ्टवेयर सञ्चालन खर्च, भ्रमण, अन्य भत्तालगायतको बजेट तत्काल लागु हुने गरी २० प्रतिशत कटौती गरिने मन्त्रालयको भनाइ छ ।

चालु आर्थिक वर्षका लागि स्वीकृत बजेट तथा कार्यक्रमभित्र परेका तर खरिद प्रक्रिया सुरु भइ नसकेका आयोजना तथा कार्यक्रमको हकमा अर्थ मन्त्रालयको पूर्वस्वीकृति र सहमतिमा मात्र खरिद प्रक्रिया अगाडि बढाउने भनेको छ । मन्त्रालयको पूर्वस्वीकृतिबिना कुनै प्रकारको नयाँ दरबन्दी सिर्जना थप नगर्ने, नेपाल सरकारको स्रोततर्फका सबै प्रकारका गोष्ठी, सेमिनार र कार्यशाला अहिलेलाई स्थगन गर्ने र फर्निचर र नयाँ गाडी खरिद शीर्षकमा विनियोजित रकम खर्च नगर्ने गरी रोक्का राख्ने निर्णय भएको मन्त्रालयले जनाएको छ ।