राष्ट्रपतिको निर्वाचनसम्म नपुग्दै कोर्ष करेक्सनको होमवर्क
केदार भट्टराई (काका)
माघ १९, २०७९ बिहिबार १८:१७:४६
१९ माघ, काठमाडौं । वर्तमान सत्ता गठबन्धनमा देखिएका असमझदारीले आगामी फगुन २५ गते हुने राष्ट्रपतिको निर्वाचनसम्म पुग्दा सत्ता समीकरणमा कोर्ष बदलिन सक्ने सम्भावना बढेर गएको छ । यसका लागि पुरानै बाम लोकतान्त्रिक समीकरणलाई व्युँताउने आन्तरिक गृहकार्य यतिबेला भित्रभित्रै तीव्र छ । दलका जिम्मेवार नेताहरुले सार्वजनिक रुपमै यो गठबन्धन धेरै अगाडि नजाने भनिसकेका छन् ।
नेताहरुका अनुसार नेपाली राजनीतिमा केही दिनयता पर्दा अगाडिकाभन्दा पर्दा पछाडिबाट भइरहेका खेलहरुले सत्ता समीकरणमा प्रभाव जमाइरहेको देखिन्छ । राजनीतिक विचार र संविधानका मुल मर्मसम्मत सत्ता समीकरण नभएकाले पनि यसमा खटपट आएको हो ।बुधबारको प्रतिनिधिसभा बैठकमा नेताहरुको प्रस्तुतिले पनि वर्तमान सत्ता गठबन्धनको आयु लामो नभएको संकेत गरिसकेको छ ।
नेकपा माओवादीका एक नेताको भनाइमा ‘सरकार गठन भएको एकमहिना पुग्दैछ । प्रधानमन्त्री पुष्पकमल दाहाल प्रचण्डले यही गठबन्धनबाट सरकार चलाउने कुरा असहज भएको दलको बैठकमा भनिरहेका छन् । सत्ता साझेदार दलबाट पनि स्वार्थका विषयमा मात्र कुरा भइरहेका छन् । यही सरकारामा बसेर संविधानभन्दा बाहिरका हिन्दुराष्ट्र र संवैधानिक राजसंस्थाको वकालत भइरहेको छ । हामी गणतन्त्र र संघीयतालाई समय अनुकुल बनाउन खोजिरहेका छौँ । तर, यही सरकारमा यसको विरोधीहरुको बोलवाला चलिरहेको देखिन्छ ।
यस्तो अवस्थामा सँगै जान सकिने स्थिति नदेखिएकाले पहिलोको गठबन्धनमा कोर्ष करेक्सन गर्ने हो कि भन्ने विषयमा छलफल चलिरहेको छ ।’ स्रोतका अनुसार अहिले भइरहेका आन्तरिक र गोप्य छलफलहरुमा प्रधानमन्त्रीले पुरै मन्त्रिमण्डललाई पुनर्गठन गर्नेबारे पनि कुरा उठेको छ । प्रधानमन्त्रीबाहेक सबै मन्त्रीलाई हटाएर कांग्रेसलाई उपप्रधानमन्त्रीसहित दिएर नेकपा एकीकृत समाजवादी र जनता समाजावादीलाई लिएर नयाँ मन्त्रिमण्डल बनाएर जाने तयारी पनि छ । यसमा राष्ट्रिय स्वतन्त्र पार्टीलाई पनि सहभागी गराउने कुरा रहेपनि उससँग भने यो विषयमा छलफल भएको छैन् । जनमत पार्टी भने छलफलमै सहभागी छ ।
पहिलेको सत्ता गठबन्धनले सरकार बनाउने तयारी गरिरहँदा माओवादीका अध्यक्ष प्रचण्ड प्रधानमन्त्री बन्दा नेपाली कांग्रेसबाट उपप्रधानमन्त्रीसहित सरकारमा जाने कुरा थियो । उपसभापति पूर्णबहादुर खड्काले कांग्रेसबाट सरकारको नेतृत्व गर्ने कुरामा कांग्रेसबाटै विरोध भएपछि अघिल्लो गठबन्धन भत्किन पुगेको कांग्रेसका एक नेताले नेपालबहसलाई बताए । उनले भने देउवा पहिलो चरणमा प्रधानमन्त्री हुँदा डा. शेखर कोइराला र माओवादीबाट एकजनालाई उपप्रधानमन्त्री बनाउने कुरा थियो तर, सभापति देउवाले विश्वास गरेका डा.प्रकाशशरण महत र विमलेन्द्र निधिलगायतका नेताले विपरित रोल खेल्दा गठबन्धन भत्कियो ।
पछिल्लो समय माओवादीको बैठकमा पनि प्रधानमन्त्री प्रचण्डलाई काम गर्न नेकपा एमालेका अध्यक्ष केपी शर्मा ओलीसँग भन्दा कांग्रेस सभापति देउवासँग सहज हुने कुरा उठेको थियो । तर, तत्कालै सरकार बन्ने वित्तिकै के गर्ने भन्ने कुरा पनि आयो,ती नेताले भने, ‘पार्टीका केही साथीहरु लागिरहनुभएको छ । कांग्रेसले पनि निर्णय दिएको छैन । अरु दलसँगको छलफलमा के हुन्छ त्यो अनुसार प्रधानमन्त्री अगाडी बढ्नुहुन्छ ।’ एमालेले राष्ट्रपति पनि लाग्यो भने देशको राजनीतिले नै अर्कै मोड लिने माओवादी नेताहरुको बुझाइ छ ।
कोर्ष करेक्सन गरेर नयाँ समीकरण बन्दा एमाले र राप्रपाबाहेकाको बन्न सक्ने नेताहरुको भनाइ छ । सरकार स्थिर राख्नका लागि कांग्रेस, माओवादी, नेकपा एस र जसपा भए पुग्छ । उनीहरु पहिले पनि सँगै थिए । अहिले पनि उनीहरुबीच निरन्तर वार्ता भइरहेको नेकपा एसका एक नेताको भनाइ छ । उनले भने,‘ ‘विगतमा एउटै पार्टीको प्रधानमन्त्री र राष्ट्रपति हुँदा हामीले निकै क्षति बेहोरिसकेका छौं । सात दलीय गठबन्धनको सहमतिअनुसार अढाई वर्षपछि फेरि एउटै पार्टीको प्रधानमन्त्री र राष्ट्रपति हुँदा के अवस्था हुन्छ भन्ने कुरामा हामीले बेलैमा सोच्नुपर्ने अवस्था छ ।’
उनले आफ्नो पार्टी यही सरकारमा जानेभन्दा पनि हिजोकै वाम लोकतान्त्रिक गठबन्धनको सरकार बनाउनुपर्ने पक्षमा रहेको बताए । पहिले के कारणले हाम्रो गठबन्धन टुट्यो भन्नेतिर नगइ अब फेरि वाम लोकतान्त्रिक गठबन्धन बन्नुपर्छ, हिजोको गल्ती अब सच्चिनुपर्छ भनेर प्रयास भइरहेको उनले बताए । तर, कोर्ष करेक्सन गर्ने छलफल कुन स्थानमा र कसरी भइरहेको छ भन्ने कुरा भने नेताहरूले खोलेका छैनन् । नेपाली कांग्रेसका नेता डा. शेखर कोइरालाले विराटनगर पुगेर कांग्रेस चाँडै सरकारमा जाँदैछ भनेका थिए ।
शहिद सम्मान कार्यक्रममा सहभागी हुन तनहुँ पुगेका अर्का कांग्रेस नेता रामचन्द्र पौडेलले पनि प्रधानमन्त्री प्रचण्डलाई एमाले नेतृत्वको गठबन्धनबाट निकालेर कांग्रेसमा ल्याउने प्रयास भइरहेको र यो प्रयास अन्तिम चरणमा रहेको बताएका थिए । उनको यो भनाइ आएको भोलिपल्ट नै प्रचण्डलाई भेट्न ओली बालुवाटार पुगेका थिए । प्रधानमन्त्री माथि स्वार्थकन्द्रित विषयमा दवाव बढाइरहेका ओली पनि पछिल्लो समय यो गठबन्धनलाई राष्ट्रपतिको निर्वाचनसम्म कसरी पुर्याउने भन्ने खेलमा लागेका छन् । यो गठबन्धन दिगो नजानेमा उनी पनि ढुक्क छन् ।
केदार भट्टराई (काका)
नेपालबहस डटकमका कार्यकारी सम्पादक केदार भट्टराई दुई दशकदेखि नेपाली पत्रकारितामा क्रियाशील छन् । भूगोल साप्ताहिकबाट पत्रकारिता शुरु गरेका पत्रकार भट्टराईले साप्ताहिक विमर्श, देशान्तर, रेडियो नेपाल वाणी नेटवर्कमा काम गरिसकेका छन् । भट्टराईले आर्थिक, राजनीतिक, भ्रष्टाचार एवं विकृति र विसंगतिका विरुद्ध तीखो कलम चलाउँदै आएका छन् ।
लेखकबाट थपगिरीबन्धु टि स्टेटको जग्गा किनबेचमा पुनरावलोकन गर्न नपाइने, नैतिक संकटमा ओली
जेठ २, २०८१ बुधबार
गिरीबन्धु टि स्टेटको जग्गा किनबेचमा पुनरावलोकन गर्न नपाइने, नैतिक संकटमा ओली
जेठ २, २०८१ बुधबार
भान्सामा राखिएका यी चिजले घरमा गरिबी ल्याउछ आजै हटाउनुहोस्
जेठ २, २०८१ बुधबार
बिहिबारदेखि काठमाडौंका यी क्षेत्रमा ६ घण्टा विद्युत अवरुद्ध हुने
जेठ २, २०८१ बुधबार
लाङटाङ हिमाल पदमार्गमा सरसफाइ गरिने
जेठ २, २०८१ बुधबार
टेबल टेनिस खेलाडी स्यान्टु पेरिस ओलम्पिकमा छनोट
जेठ २, २०८१ बुधबार
दुबई र कुवेतमा कार्यालय खोलेर नेपालबाट मानव तस्करी
जेठ २, २०८१ बुधबार
ट्राफिकको यान्त्रिक चेकिङमा ५३ जना चालकमाथि कारबाही
जेठ २, २०८१ बुधबार
पेट्रोलियम पदार्थको मूल्य घट्यो
जेठ २, २०८१ बुधबार
एमालेले मुख्यमन्त्री सोडारीलाई विश्वासको मत दिने
जेठ २, २०८१ बुधबार