यो सम्झिने मन छ, म बिर्सु कसरी …….?

२ फागुन, काठमाडाैं । समय सधै एकनासको नहुने रैछ । न सोचे जस्तो न चाहे जस्तो बितेको समय न फर्केर आउछ । त्यो पल अनि  बितेका यादगार समय सम्झनाका पानामा सीमित रहेका छन् । बडो अचम्मको छ यो मानव मष्तिस्क पनि, नसम्झनुपर्ने कुरा सजिलै सम्झन्छ, नबिर्सनुपर्ने कुरा बिर्सन्छ ।

यही दिमाग र मुटुको जिद्दीले नै त हो प्यारो मान्छे, तिमीले दिएको माया होस् वा तिमीले पलपलमा सम्झाएको ज्ञानका कुरा सबै उत्तिकै ताजा छन् । र, तिनै ताजा सम्झनाहरु बिझाउने सुइला बनेका छन् र त घाेच्छन् घरिघरि मन मुटुमा च्वास्स–च्वास्स पारेर ।

अँ साच्चि ! आज प्रेम दिवस,, तिमीलाई मुटुभरिको माया अनि मिठो सम्झना छ, प्यारो मान्छे । यो प्रेम दिवसमा अनगिन्ती सम्झना र अलौकिक प्यार, प्यारो मान्छे । तिमीप्रतिको अमूर्त र अतुलनीय प्रेमभावलाई हुन त न यो पत्रले के पुरा गर्ने थियो र ! प्यारो मान्छे ! यो प्रेम दिवसमा तिमीलाई बिनासितै अझै धेरै सम्झिरहेकी छु, के तिमी पनि मलाई यसरी नै सम्झिरहेका छाै र ?  के तिमीले पनि मलाई मैलै तिमीलाई गरेको जस्तै माया गर्छौ होला र ? यो सम्झिने मन न हो ।

हेर प्यारो मान्छे ! मेरो मन तिमीलाई बगैंचामा ढकमक्क फुलेको सुन्दर फूल सम्झन्छ । मेरो मन अस्ताउन लागेको सूर्य बनेर बगैंचाको फूललाई देख्ने बित्तिकै क्षितिजभित्र बिलाउन चाहँदैन । मन त, उदाउँदै गरेको घाम बनेर दिनभरि त्यही फूललाई चिहाइरहन चाहन्छ । आफ्ना रंगीन किरणहरु त्यही फूलका पत्र–पत्रभित्रका अनेक रंगहरुसँगै घुलाउन चाहन्छ । आफ्नो प्रकाशले दिनभरि फूलका पातहरुलाई खाना बनाउन सघाइरहन चाहन्छ । तिनै फूलका पातलाई स्पर्श गर्दै जरा–जरासम्म बग्न चाहन्छ ,मेरो मन, घामको किरण बनेर तिमीसँगै रमाउन चाहन्छ, प्यारो मान्छे ।

प्यारो मान्छे ! प्रेम शाश्वत छ । महान छ र, दूरताले यसलाई अझ गाढा बनाउँछ । प्रेममा एक अर्काको अनुपस्थितिले यादलाई अझ प्रगाढ बनाउँछ र माया चरमोत्कर्षमा पुग्छ । विश्वभरिका राता गुलाफहरु जोडेर मैले तिमीलाई विराजमान गराउन सिंहासन तयार गरेकी छु । फूलको राजा गुलाफ भएझैं तिमी मेरो जिन्दगीको राजा हौ । सधैंको लागि तिम्रो सवारी होस् अनि सुस्तरी बस है, यो गुलाफमय रक्तिम सिंहासनमा । प्रेमजस्तै कोमल र नाजुक छ यो पनि र भत्किन सक्छ . बस ! यस्तै यस्तै सम्झिरहन्छ यो सम्झिने मनले, प्यारो मान्छे ।

कहिले काँही त म रातको शून्यतामा तिम्रो पदचापको आहटले पटकपटक ब्युँझिन्छु । तिमी आउने छौ, मेरो छेउमा बस्छौ, अङ्गाल्ने छौ अनि मलाई चुम्ने छौ कपालका रेसा रेसा । म्वाई खाने छौ यो प्यासी अधरमा अनि मलाई न्यानो पार्न आफ्नो छातीमा टाँस्ने छौँ, त्यसपछि दुवै जना हामी त्यो मिलनलाई हर्षोल्लास र उन्मादसहित मनाउने छौं । यो सम्झिने मन नै त हो । बस, यस्तै कल्पना कल्पनामा बित्छन रात ।

तिम्रो प्रेमलाई मैले कसरी ग्रहण गरेकी रहेछु, कति अनुभूत गरेकी छु भन्ने कुरा त तिमीले जति मलाई बुझेका छौ त्यति नै मेरो भावलाई पनि बुझेका छौ भन्ने पूर्ण विश्वासमा रहेकी छु म । थाहा छ प्यारो मान्छे ! प्रेमलाई विशुद्ध रुपमा अनुभूत गर्न मैले तिमीबाटै सिकेको हुँ । प्रेमलाई परिभाषित होइन, अनुभूत गर्नुपर्छ भन्ने ज्ञान तिमीबाट नै सिक्ने मौका पाएकी हुँ । तिम्रो प्रेमको तुलना अरु कुनै व्यक्ति वा वस्तुसँग हुन त सक्दै सक्दैन । र, यस्तो विशिष्ट प्रेमभावलाई तुलना गर्न मेरो आत्माले पनि अनुमति दिँदैन ।

प्यारो मान्छे ! थाहा छ आज प्रेम दिवस हो । संसारभर प्रेमका कयौँ उपमाहरु सिर्जिएका छन् । प्रेमका पूजारीहरुले प्रेमलाई संसारका अमूल्य, अटल र कहिल्यै अस्तित्व नाश नहुने अजरअमर वस्तुहरुसँग तुलना गरेको पढेकी छु, सुनेकी छु । तर मेरा निम्ति तिमी एक अतुलनीय अनुभूति हौं । प्रेमको एउटा पूर्ण स्वरुप हौं । हाम्रो प्रेम कसरी यस्तै अमूर्त रितले हुर्कँदै आएको छ भन्ने हामी दुवैले महसुस गरेका छौँ ।

तिमी मलाई कति प्रेम गर्छौ भन्ने कुरा न शब्दले व्याख्या नै गर्न सक्छु प्यारो मान्छे, न त अङ्कले गणना नै गर्न सक्छु । तिमी नै एउटा पूर्ण प्रेमको प्रतिमूर्ति हौं । तिमी अर्थात प्रेम एउटा त्यस्तो अनुभुति रहेछ जसलाई म अनुभूत गर्नुमा मात्रै न्यायोचित ठान्छु । शब्दमा उतार्दा त्यो सग्लो भाव टुक्रिन्छ कि भन्ने डर लागेको छ । मेरा निम्ती तिमी त्यो अद्भूत चिज हौं प्यारो मान्छे । प्रेमले हामीलाई यति तरल बनाएको छ कि हामी एकअर्कामा सजिलै मिल्छौँ, मिसिन्छौँ । मैले जे ओकल्छु, तिमी त्यसलाई ठ्याक्कै त्यसरी नै बुझ्छौ ।

प्यारो मान्छे ! तिमी कति महान छौ, हैं । म चाहन्छु तिमीलाई आराम भएको, न्यानो भएको, तिमी तन्दुरुस्त भएको देख्दा म आफैँलाई बिर्सिन्छु । त्यो पूर्ण विस्मृतिको क्षणमा तिमीलाई अनुभूत गर्दा म चङ्गा भएको महसुस गर्छु । तिम्रो सुस्वास्थ्य र खुशीको लागि जस्तोसुकै तपस्या गर्न पनि म तयार छु प्यारो मान्छे । तिमी खुशी भएको देख्दा मेरो खुशी दोब्बर भएर आउँछ, तिमी स्वस्थ भइरहँदा ममा स्फुर्ति बढ्छ, तिमी हाँसेको बखत मेरो चेहरामा एक हजार वाटको चमक आउँछ । बस, यो सम्झिने मन हो प्यारो मान्छे ।

प्यारो मान्छे तिमीसँगको प्रेमिल उठबसले मैले कयौँ ज्ञान लिएकी छु । तिम्रो एक शब्दमा मैले कत्रो-कत्रो उर्जा भेटेकी छु । नसिकाएरै सिकाउने, नबुझाएरै बुझाउने तिम्रो अद्भुत कलामा मैले अनौठो गुरुत्व भेटेकी छु । हरेक क्षण म भगवानप्रति आभारी छु, आफ्नो अन्तरहृदयको प्रेम पाएकोमा । तिमीप्रति हरक्षण कृतज्ञ छु तिमीलाई यो प्रेम दिवसको धेरै धेरै शुभकामना प्यारो मान्छे ………