लघुवित्त पीडितद्वारा उदयपुर सीडीओ कार्यालय घेराउ [तस्बिरहरू]

१५ फागुन, काठमाडौं । लघुवित्त वित्तीय संस्थाको चर्को ब्याजबाट उठीबासको अवस्थामा पुगेका पीडितहरुले मंगलबार उदयपुर जिल्लाा प्रशासन कार्यालय घेराउ गरेका छन् ।

उनीहरुले लघुवित्तले ऋण प्रवाहको बेलाभन्दा बिचमा चर्को मात्रामा ब्याज बढाएर आर्थिक मार खुवाएको भन्दै लघुवित्त संचालनहरुमाथि कारबाहीको माग गर्दै घेराउ र धर्ना दिएका हुन् । उनीहरु र्यालीसहित सीडीओ कार्यालयको मुख्य प्रवेश द्वारमा पुगेर धर्ना दिएका थिए ।

उनीहरुले चर्को ब्याज असुलेर ज्यादति गर्ने लघुवित्त खारेज गर्नुपर्ने, काम र क्षमताको आधारमा सहुलियत ब्याजदरमा ऋण प्रवाह गर्नुपर्ने, लघुवित्तको ऋण निश्चित आकार तोकेर बाँकी मिनाह गर्नुपर्ने लगायत माग गरेका छन् । साथै गरिब किसानलाई निःशुल्क ऋण उप्लब्ध गराउन माग गरे ।

धर्नामा २ सयभन्दा बढी ऋणीहरू सहभागी थिए । सहभागीमध्ये बढी संख्यामा महिलाहरू थिए । उनीहरू प्लेकार्ड, ब्यानर बाेकेर धर्नामा पुगेका थिए ।

लघुवित्त र बैंक लगायत वित्तीय संस्थाहरुले चर्को ब्याज लिन थालेपछि देशैभरबाट ऋणीहरु विरोध प्रदर्शनमा उत्रिएका छन् ।

यता नेपाल राष्ट्र बैंकले आजै मात्र एक सन्देश जारी गर्दै लघुवित्तबाट प्रवाह गरिने ऋणको ब्याज १५ प्रतिशत मात्र कायम रहेको जानकारी दिँदै त्योभन्दा बढी ब्याज लिएमा सुरक्षा निकायमा उजुरी दिन आह्वान गरेको छ ।