विराटनगरकाे विभिन्न स्थानमा अनिश्चितकालीन निषेधाज्ञा घोषणा

१७ फागुन, मोरङ । प्रदेश १ का मुख्यमन्त्रीको कार्यालय र निवास तथा प्रदेशसभा भवन क्षेत्रमा जिल्ला प्रशासन कार्यालयले निषेधाज्ञा घोषणा गरेको छ । प्रदेशसभाले प्रदेशको नामाकरण आजै गर्ने तयारी गरेपछि प्रदेशसभा आसपासको क्षेत्रमा धर्ना, जुलुस तथा प्रदर्शन गर्न निषेध गरिएको हो ।

निषेधाज्ञा बुधबार दिउँसो ३ बजेदेखि शुरु हुने र अनिश्चितकालसम्म कायम रहने जिल्ला प्रमुख अधिकारी (सीडीओ) तीर्थराज भट्टराईले आजै एक रुरी सूचनामार्फत जानकारी दिएका छन् ।

सीडीओ भट्टराईले निषेधाज्ञा प्रदेश १ को प्रदेशसभा नामाकरणको प्रक्रिया प्रारम्भ भई टुंगो नलागेसम्म कायम रहने उल्लेख गरेका छन् । तथापि नामाकरण भएपश्चात पनि असहमत पक्षहरुबाट हुन सक्ने सम्भावित विरोध, धर्ना, जुलुस, झडपको अवस्था कायम रहेसम्म निषेधाज्ञा कायम रहने भनिएको छ ।

उनले विराटनगरस्थित देवकोटा चोकदेखि कोशी अस्पताल चोकसम्म, जिल्ला प्रशासन कार्यालय वरपर, मुख्यमन्त्री तथा मन्त्रिपरिषद्को कार्यालय र माननीय मुख्यमन्त्रीज्यूको निवास वरपर मिति २०७९/११/१७ गते दिउँसो ३ बजेदेखि अर्को आदेश नभएसम्म निषेधाज्ञा जारी रहने जनाएका छन् ।

स्थानीय प्रशासन ऐन २०२८ को दफा ६ (३) (क) बमोजिम कुनै किसिमका सभा, जुलस, भेला, ¥याली, धर्ना जस्ता कार्यहरु गर्न निषेध गरिएको जरुरी सूचनामा जनाइएको छ । आदेश उल्लंघन गरी उल्लेखित कार्यहरु गरेको पाइएमा प्रचलित कानून बमोजिम कारबाही गरिने उल्लेख छ ।

आजै मात्र प्रदेशसभा सचिवालयले गरेको प्रदेशको नामाकरणका लागि प्रदेशसभामा रहेका दलहरुसँगको नाम प्रस्ताव आह्वानमा एमाले, कांग्रेस र माओवादी केन्द्रले ‘कोशी’ र एकीकृत समाजवादी र जसपाले किरात–लिम्बूवान–सगरमाथा’ प्रस्ताव दर्ता गरिसकेका छन् ।

९३ सदस्यीय प्रदेशसभामा एमाले, ४०, कांग्रेस २९ र माओवादी केन्द्र १३ सदस्इ छन् । प्रस्ताव पारित हुन कुल सदस्य संख्याका दुई तिहाई अर्थात ६३ मत आवश्यक पर्छ । तीन दल मिल्दा आवश्यक संख्याभन्दा बढी हुने भएका कारण प्रदेशको नाम ‘कोशी’ पारित हुने निश्चितप्रायः छ ।