आठ दलीय गठबन्धनका कारण सातै प्रदेशमा एमालेलाई धक्का
केदार भट्टराई (काका)
फागुन १८, २०७९ बिहिबार १८:२२:३८
१८ फागुन, काठमाडौं । गत पुष १० मा भएको सहमति भाडिएपछि संघीय सरकाबाट बाहिरिएको नेकपा एमालेलाई राष्ट्रपतिको निर्वाचनपछि प्रदेशमा समेत ठूलै धक्का लाग्ने देखिएको छ । आठ दलीय गठबन्धन कायम रहेमा र प्रदेशसभाले महाअभियाग लगाएमा एमालेले प्रदेश सभामुख पनि गुमाउनुपर्ने अवस्था सिर्जना हुँदैछ । प्रदेशमा राष्ट्रिय स्वतन्त्र पार्टीको उपस्थिति नरहेकाले पनि एमाले अप्ठ्यारोमा पर्ने देखिएको छ ।
राष्ट्रपति निर्वाचनको पृष्ठभूमिमा केन्द्रमा भएको राजनीतिक समीकरण परिवर्तनले प्रदेशको सत्तामा पनि एमालेलाई प्रभाव पर्ने देखिएको हो । एमालेको नेतृत्वमा रहेका प्रदेश सरकार ढल्ने सम्भावना बढेको छ भने अन्य प्रदेशमा पनि सत्ता साझेदार दल फेरिने सम्भावना बढेको छ । यसपटक प्रदेश सरकार बनेको दुई महिना नहुँदै फेरीने सम्भावना प्रवल देखिएको छ ।
बुधबार मात्र नामकरण भएको कोशी प्रदेश एमालेका लागि सबैभन्दा बलियाे प्रदेश हो । तर, कोशीमा एमालेबाट मुख्यमन्त्री बनेका हिक्मत कार्की सत्ता समीकरण हेरफेरका कारण संकटमा परेका छन् । कार्की माओवादी केन्द्र, राप्रपा र जनता समाजवादी पार्टीको समर्थनमा गत पुस २४ मा मुख्यमन्त्री बनेका थिए ।
९३ सिट रहेको कोशी प्रदेशसभामा नेकपा एमालेले प्रत्यक्षतर्फ २५ र समानुपातिकतर्फ १५ गरी ४० सीट जितेर पहिलो दल बनेको थियो । प्रत्यक्षमा १७ र समानुपातिकमा १२ सहित २९ सीट जितेर कांग्रेस दोस्रो तथा प्रत्यक्षमा ९ र समानुपातिकमा ४ सहित १३ सीट जितेर माओवादी तेस्रो दल बनेको छ । राप्रपाले प्रत्यक्षमा दुई र समानुपातिकमा चार गरी र ६ सीट जितेर चौथो दल बन्दा एकीकृत समाजवादीले प्रत्यक्षमा ३ र समानुपातिकमा एकसहित चार सीट जितेको छ ।
प्रत्यक्षमा कुनै जित ननिकालेको जसपाले समानुपातिकमा एक सीट पाएको छ । त्यहाँ नयाँ गठबन्धनबाट जोड्दा ४७ सीट हुन्छ । माओवादी र जसपाले मुख्यमन्त्री कार्की नेतृत्वको सरकारलाई दिएको समर्थन फिर्ता लिदा उनी संकटमा पर्छन । राप्रपाले समर्थन फिर्ता लिएमात्र पनि कार्की नेतृत्वको सरकार ढल्छ ।
मधेश प्रदेशमा एमाले अगाडी भएपनि यो प्रदेशमा राष्ट्रपतिको निर्वाचन लगत्तै सरकार परिवर्तनको कसरत भएरहेको छ । मधेसमा जसपाको नेतृत्वमा एमालेसहितको सरकार छ । जसपा नयाँ आठ दलीय गठबन्धनमा सामेल रहेकाले मधेस सरकारको नेतृत्व भने तत्काल फेरबदल नहुने देखिएको छ । राष्ट्रपति र उपराष्ट्रपतिको निर्वाचनपछि कांग्रेस, एकीकृत समाजवादी र लोसपा समेत प्रदेश सरकारमा सहभागी भएका छन् । यो अवस्थामा सरकारमा बसिरहनु एमालेका लागि घातक हुन्छ । एमालेले भने मुख्यमन्त्री सरोजकुमार यादवलाई दिएको समर्थन कायम रहेको र सरकार छोड्नुपर्ने अवस्था नआएको बताएको छ ।
१०७ प्रदेशसभा सदस्य रहेको मधेस प्रदेशमा एमालेका २५ सांसद छन् । मधेस सरकारमा हाल एमालेका चार जना मन्त्री र सभामुख छन् । मधेशमा सरकार निर्माणमा बहुमतका लागि ५४ सांसद चाहिन्छ । जसपा संसदीय दलका नेता सरोजकुमार यादवलाई प्रदेशसभाका १० दलमध्ये ७ दल र २ स्वतन्त्र गरी ६३ सांसदले समर्थन गरेका थिए । सरकारमा जसपा, एमाले, माओवादी र जनमत पार्टी छन् । १०७ सीट रहेको मधेस प्रदेश सभामा प्रत्यक्षमा १५ सीट जितेको नेकपा एमालेले समानुपातिकमा ८ सीट थपेर २३ सीट प्राप्त गर्दै पहिलो दल बनेको छ । यस्तै प्रत्यक्षमा १३ सीट जितेको कांग्रेसले समानुपातिकमा सबैभन्दा बढी ९ सीट जिते पनि २२ सीटसहित दोस्रो स्थानमा छ ।
यसअघि मधेशमा पहिलो दल बनेको जसपा यसपालि तेस्रो दल बनेको छ । उसले प्रत्यक्षमा नौ र समानुपातिकमा सातसहित १६ सीट जितेको छ । प्रत्यक्षमा ६ सीट जितेको जनमत पार्टीले समानुपातिकमा ७ सीट हासिल गरी १३ सीटसहित तेस्रो दल बन्दा लोसपाले प्रत्यक्षमा सात र समानुपातिकमा दुई सीट पाएर पाँचौ दल भएको छ । मधेसमा माओवादीले प्रत्यक्ष र समानुपातिकमा चार–चार सीट जितेको छ भने एकीकृत समाजवादीले प्रत्यक्षमा चार र समानुपातिकमा तीन सीट पाएको छ । प्रत्यक्षमा ६ सांसद स्वतन्त्र उम्मेदवारीबाट आएका छन् । राप्रपा, नेपाल संघीय समाजवादी र नागरिक उन्मुक्ति पार्टीले समानुपातिकतर्फ एक–एक सीट जितेका छन् । मधेशमा अहिलेको गठबन्धनको बहुमत पुग्छ ।
यता, बाग्मती प्रदेशमा एसैपनि एमाले सरकार छाड्ने पक्षमा पुगिसकेको छ । वाग्मती प्रदेशमा सरकारबाट बाहिरिँदै रापप्रपाले मुख्यमन्त्री शालिकराम जम्कट्टेललाई दिएको समर्थन पनि फिर्ता गरेको छ । एमाले अहिले सरकारमै भएपनि केही दिनमै सरकार छाड्ने मनस्थितिमा छ । सरकारको नेतृत्व माओवादीले गरिरहेका कारण यो प्रदेशमा पनि मुख्यमन्त्री तत्काल हेरफेर हुने सम्भावना देखिदैन् । प्रदेशसभामा प्रतिनिधित्व गर्ने ७ दलमध्ये ५ दलका ७० सांसदको समर्थनमा माओवादीका जम्कट्टेल मुख्यमन्त्री बनेका थिए । ११० सांसद रहेको वाग्मतीमा सरकार निर्माणका लागि ५६ सांसद चाहिन्छ ।
एक सय १० सिट रहेको बागमती प्रदेश सभामा प्रत्यक्षमा २५ र समानुपातिकमा १२ गरी ३७ सीटसहित नेपाली कांग्रेस ठूलो दल रहेको छ । प्रत्यक्षमा १३ र समानुपातिकमा १४ सीटसहित २७ सीट पाएको एमाले दोस्रो ठूलो दल रहेको छ । प्रत्यक्षमा १४ र समानुपातिकमा सात गरी २१ सीटसहित माओवादी तेस्रो दल बन्दा प्रत्यक्षमा सात सीट जितेको राप्रपाले समानुपातिकमा ६ सीट थपेर चौथो ठूलो दल बनेको थिए । एकीकृत समाजवादीले भने प्रत्यक्षमा पाँच र समानुपातिकमा दुई सीट जितेको छ । नेमकिपाले प्रत्यक्षमा एक र समानुपातिकमा दुई तथा हाम्रो नेपाली पार्टीले प्रत्यक्ष र समानुपातिकमा एक–एक सीट जितेका छन् । यो प्रदेशमा सरकार परिवर्तन हुँदा कांग्रेसले नेतृत्व लिने सम्भावना बढी छ ।
उता, गण्डकीमा माओवादी र राप्रपाको समर्थनमा एमालेबाट खगराज अधिकारी मुख्यमन्त्री बनेका छन् । केन्द्रीय राजनीतिक समीकरणअनुसार यो सरकार धरमरमा छ । राप्रपाले राष्ट्रपति निर्वाचनअघि सरकार नछाड्ने जनाएपनि अधिकारीको सरकार बच्ने सम्भावना छैन् । राप्रपाले मात्र समर्थन फिर्ता लिँदा सरकार अल्पमतमा पर्छ । ६० सदस्यीय प्रदेशसभामा एमालेका २२, माओवादीका ८ र राप्रपाका २ सदस्य छन् । सरकार निर्माणका ३१ सांसद चाहिन्छ । २७ सीट रहेको कांग्रेस र माओवादी मिल्दा बहुमत पुग्छ । माओवादीले आधाआधा कार्यकाल नेतृत्व लिने गरी अब कांग्रेससँग सहकार्य गरिने माओवादीका एक सांसदले बताए । गण्डकीमा ५ वर्ष नै एमालेलाई नेतृत्व दिनेदुई महिनाअघि भएको सम्झौताप्रति माओवादी असन्तुष्ट थियो ।
६० सीट रहेको गण्डकी प्रदेशसभामा २७ सीटसहित कांग्रेस पहिलो दल बनेको थियो । प्रत्यक्षमा १८ सीट जितेको नेपाली कांग्रेसले समानुपातिकतर्फ थप ९ सीट पाएको थियो भने प्रत्यक्षमा १२ सीट जितेको एमालेले समानुपातिकबाट सबैभन्दा बढी १० सीट जितेर २२ सीटसहित दोस्रो ठूलो दल कायम छ । तेस्रो स्थान सुरक्षित गरेको माओवादीले प्रत्यक्षतर्फ चार र समानुपातिकतर्फ तीन गरी सात सीट जितेको छ । यस्तै समानुपातिकमा राप्रपाले २ सीट जित्दा प्रत्यक्षतर्फ नेपाल समाजवादी पार्टीले एक र एक जना स्वतन्त्र उम्मेदवार निर्वाचित भएका थिए ।
यस्तै लुम्बिनीमा पनि सरकार फेर्ने छलफल सुरु भइसकेको छ । केन्द्रमा फेरिएको समीकरणअनुसार प्रदेश सरकार गठन गर्न लुम्बिनी प्रदेशमा औपचारिक छलफल सुरु भएको छ । सरकारमा सहभागी आठ दलमध्ये एमाले र राप्रपाबाहेकका ६ दलसहित कांग्रेस, जनमोर्चा र एकीकृत समाजवादीको संयुक्त बैठक बुधबार दाङको देउखुरीमा भएको थियो । बैठकले मुख्यमन्त्री लीला गिरीलाई दिइएको समर्थन एकैसाथ फिर्ता लिने समझदारी गरेका छन् । एमालेबाट मुख्यमन्त्री बनेका गिरीलाई ८ दलका ५७ र दुई स्वतन्त्रसमेत गरी ५९ सांसदले विश्वासको मत दिएका थिए । लुम्बिनीमा कांग्रेसले प्रदेश सरकारको नेतृत्व लिन चाहेको छ ।
८७ सीट रहेको लुम्बिनी प्रदेशसभामा नेकपा एमाले पहिलो दल छ । प्रत्यक्षमा १८ सीट जितेको एमालेले समानुपातिकमा ११ सीट थपेर २९ सीट बनाएको थियो । प्रत्यक्षमा १७ र समानुपातिकमा १० सहित २७ सीट जितेको नेपाली कांग्रेस दोस्रो ठूलो दल बनेको छ । प्रत्यक्षमा पाँच सीट जितेको माओवादीले समानुपातिकमा थप चार सीट जितेको नौ सीटसहित तेस्रो दल बनेको छ । त्यस्तै नागरिक उन्मुक्ति पार्टी र राप्रपाले प्रत्यक्ष र समानुपातिकमा समान दुई–दुई सीट जितेका छन् । जसपा र लोसपाले प्रत्यक्षमा दुई र समानुपातिकमा समान एक–एक सीटसहित ३–३ सीट लिएका छन् । जनमत पार्टीले प्रत्यक्ष र समानुपातिकमा १–१ गरी दुई सीट जितेको छ । राष्ट्रिय जनमोर्चाले समानुपातिकमा एक मात्र सिट पाउँदा प्रत्यक्षतर्फ तीन स्वतन्त्र निर्वाचित सांसद छन् ।
उता, कर्णालीमा पनि सरकार परिवर्तनको तयारी भइरहेको छ । कर्णालीमा माओवादीबाट मुख्यमन्त्री बनेका राजकुमार शर्मालाई माओवादी, एमाले, एकीकृत समाजवादी र राप्रपाका सांसदले गत माघ २६ मा विश्वासको मत दिएका थिए । राप्रपाकी सांसद सन्तोषी शाहीले बुधबार समर्थन फिर्ता लिएकी छन् । तीन मन्त्री प्रतिनिधित्व गराएको एमालेले अहिलेसम्म सरकार छाडिसकेको छैन । राष्ट्रपति निर्वाचनपछि कर्णालीमा माओवादी र कांग्रेसको सरकार बन्ने निश्चितजस्तै छ । ४० सीट रहेको कर्णाली प्रदेशसभामा नेपाली कांग्रेस पहिलो दल बनेको छ ।
प्रत्यक्षमा ९ सीट जितेको कांग्रेसले समानुपातिकमा ५ सीट सहित कुल १४ सिट जितेको छ । यस्तै प्रत्यक्षमा नौ र समानुपातिकमा चार गरेर १३ सीट जोडेको माओवादी दोस्रो दल बन्दा प्रत्यक्षमा पाँच र समानुपातिकमा पाँच गरेर १० सीटसहित एमाले तेस्रो दल बनेको छ । एकीकृत समाजवादी र राप्रपाले समानुपातिकतर्फ एक–एक सीट प्राएका थिए । प्रत्यक्षतर्फ एक सीट स्वतन्त्रले जितेका लगेका छन् ।
सुदूरपश्चिममा एमाले नेतृत्वको सरकार गएर मुख्यमन्त्रीमा कांग्रेस आएको छ । कांग्रेसबाट मुख्यमन्त्री बनेका कमलबहादुर शाहले फागुन २१ भित्र विश्वासको मत लिने तयारी गरिरहेका छन् । संघीय समीकरण फेरबदलका कारण शाहलाई विश्वासको मत पुर्याउन सहज हुने देखिएको छ । यसअघि विश्वासको मत पाउन नसकेर एमालेका राजेन्द्रसिंह रावल नेतृत्वको सरकार ३० दिनमै ढलेको थियो । सरकार गठनमा साथ दिएको नागरिक उन्मुक्ति पार्टीले संरक्षक रेशम चौधरीको रिहाइ सुनिश्चितताको माग राखेर विश्वासको मत नदिँदा एमाले सत्ताबाट बाहिरिएको थियो । त्यसपछि प्रदेशसभाको सबैभन्दा ठूलो दल कांग्रेसको संसदीय दल नेताका हैसियतमा शाह मुख्यमन्त्री नियुक्त भएका थिए ।
५३ सदस्यीय प्रदेशसभामा विश्वासको मतका लागि २७ सांसदको साथ चाहिन्छ । ५३ सीट रहेको सुदूरपश्चिम प्रदेशसभामा कांग्रेस पहिलो दल रहेको छ । उसको प्रत्यक्षमा १२ र समानुपातिकमा ७ सीट छ । प्रत्यक्षमा आठ र समानुपातिकमा तीन सीटसहित ११ सीट पाएको माओवादी केन्द्र दोस्रो ठूलो दल बनेको छ । प्रत्यक्षमा तीन र समानुपातिकमा पाँच गरेर आठ सीटसहित एमाले तेस्रो दल रहेको छ । प्रत्यक्षमा पाँच र समानुपातिकमा दुईसहित नागरिक उन्मुक्ति पार्टीले सात सीट जितेको छ । एकीकृत समाजवादीले प्रत्यक्षमा तीन र समानुपातिकमा एक सीट जितेको छ । राप्रपाले समानुपातिकमा एक सीट जितेको छ । प्रत्यक्षतर्फ एक स्वतन्त्र निर्वाचित भएका थिए ।
केदार भट्टराई (काका)
नेपालबहस डटकमका कार्यकारी सम्पादक केदार भट्टराई दुई दशकदेखि नेपाली पत्रकारितामा क्रियाशील छन् । भूगोल साप्ताहिकबाट पत्रकारिता शुरु गरेका पत्रकार भट्टराईले साप्ताहिक विमर्श, देशान्तर, रेडियो नेपाल वाणी नेटवर्कमा काम गरिसकेका छन् । भट्टराईले आर्थिक, राजनीतिक, भ्रष्टाचार एवं विकृति र विसंगतिका विरुद्ध तीखो कलम चलाउँदै आएका छन् ।
लेखकबाट थपगिरीबन्धु टि स्टेटको जग्गा किनबेचमा पुनरावलोकन गर्न नपाइने, नैतिक संकटमा ओली
जेठ २, २०८१ बुधबार
गिरीबन्धु टि स्टेटको जग्गा किनबेचमा पुनरावलोकन गर्न नपाइने, नैतिक संकटमा ओली
जेठ २, २०८१ बुधबार
भान्सामा राखिएका यी चिजले घरमा गरिबी ल्याउछ आजै हटाउनुहोस्
जेठ २, २०८१ बुधबार
बिहिबारदेखि काठमाडौंका यी क्षेत्रमा ६ घण्टा विद्युत अवरुद्ध हुने
जेठ २, २०८१ बुधबार
हृदयाघातबाट दैनिक १० हजार युरोपेलीको मृत्यु
जेठ २, २०८१ बुधबार
लाङटाङ हिमाल पदमार्गमा सरसफाइ गरिने
जेठ २, २०८१ बुधबार
टेबल टेनिस खेलाडी स्यान्टु पेरिस ओलम्पिकमा छनोट
जेठ २, २०८१ बुधबार
दुबई र कुवेतमा कार्यालय खोलेर नेपालबाट मानव तस्करी
जेठ २, २०८१ बुधबार
ट्राफिकको यान्त्रिक चेकिङमा ५३ जना चालकमाथि कारबाही
जेठ २, २०८१ बुधबार
पेट्रोलियम पदार्थको मूल्य घट्यो
जेठ २, २०८१ बुधबार