‘गुण्डा नाइके’ चक्रे मिलनविरूद्धको मुद्दामा कागजात झिकाउने सर्वोच्चको आदेश

१ चैत, काठमडौं । सर्वोच्च अदालतमा ४ वर्षदेखि विचाराधीन रहेको ‘गुन्डा नाइके’ चक्रे मिलन भनिने मिलन गुरुङको सम्पत्ति शुद्धीकरणको मुद्दामा आज भएको सुनुवाइपछि आदेश भएको छ ।

न्यायाधीशद्वय प्रकाशकुमार ढुङ्गाना र नहकुल सुवेदीको संयुक्त इजलासमा भएको सुनुवाइपछि गुरुङविरुद्धको सम्पूर्ण मिसिल झिकाउने आदेश दिएको छ ।

अपराधिक गतिविधि र अवैध तरिकाले सम्पत्ति जोडेको भन्दै सीआईबीको अनुसन्धान प्रतिवेदनका आधारमा सम्पत्ति शुद्धिकर विभागले २०७० जेठ ५ गते विशेष अदालतमा दायर गरेको मुद्दा विशेष सफाइ दिने फैसला गरेपछि सो फैसला बदरको माग गर्दै विभागले २०७५ जेठ ३० मा सर्वोच्चमा पुनरावेदन मुद्दा दिएको थियो ।

सो मुद्दामा आज संयुक्त इजलासले मिलनविरुद्ध तयार पारिएको मिसिल र सम्पूर्ण कागजात झिकाउने आदेश दिएको हो । विशेषमा विभागले सीआईबीको अनुसन्धान प्रतिवेदनको आधारमा मिलनसहित ५ जना ‘गुन्डा नाइके’हरु गणेश लामा, पर्शुराम बस्नेत, अभिषेक गिरी र दीपक मनाङ्गे भनिने राजीव गुरुङविरुद्ध २०७० जेठ ५ गते विशेष अदालतमा अवैध तरिकाले अकूत सम्पत्ति जोडेको आरोपमा मुद्दा दायर गरेको थियो ।

चक्रे मिलनविरुद्ध ८ करोड रुपैयाँ बराबरको अपराधिक तवरले सम्पत्ति आर्जन गरेको दाबी अभियोग पत्र छ । मिलनलाई एमालेको क्षेत्रीय कमिटीले गएको मंसिरमा भएको प्रतिनिधिसभाको चुनावमा गोरखा २ बाट सांसद उम्मेदवारमा समेत सिफारिस गरेको थियो । पछि केन्द्रले अब्दुस सलाम मियाँलाई टिकट दिएको थियो । उनी पराजित भएका थिए । मिलनपन्ती इन्दिरा गुरूङविरूद्ध पनि साेही मुद्दा लगाइएकाे छ ।