तनहुँ–१ मा भट्टराई र चितवन २ मा श्रेष्ठले गराए उम्मेदवारी दर्ता

२० चैत्र, काठमाडौं । आगामी बैशाख १० हुने उपनिर्वाचनमा कांग्रेसबाट उम्मेदवार बनेका गोविन्द्र भट्टराईले तनहुँ- १ र जीतनारायण श्रष्ठले चितवन-२ मा उम्मेदवारी दर्ता गराएका छन् । भट्टराईले श्यामकुमार मौरातीलाई प्रस्तावक र सरिता गुरुङलाई समर्थक राखेर मनोनयन दर्ता गरेका हुन् ।

तनहुँ–१ का तत्कालीन प्रतिनिधिसभा सदस्य रामचन्द्र पौडेल राष्ट्रपतिमा निर्वाचित भएपछि त्यहाँ वैशाख १० गते उपनिर्वाचन हुन लागेको हो । निर्वाचन आयोगले मनोनयन दर्ताका लागि सोमबार अपराह्न ५ बजेसम्मका लागि समय तोकेको छ । यस क्षेत्रका एमाले उम्मेदवार सर्वेन्द्र खनालले मनोनय दर्ता गराइसकेका छन् भने रास्वपा उम्मेदवार स्वर्णिम वाग्लेले पनि उम्मेदवारी दर्ता गरेका छन् ।

नेविसंघका पूर्वअध्यक्षसमेत रहेका भट्टराई गठबन्धनका साझा उम्मेदवार हुन् । सत्ता गठबन्धनका तर्फबाट चितवन क्षेत्र नम्बर–२ मा नेपाली कांग्रेसका नेता जीतनारायण श्रेष्ठको उमेदवारी दर्ता गराएका छन् । उपनिर्वाचनका लागि सोमबार उमेदवारी दर्तापछि सत्ता गठबन्धनका तर्फबाट आयोजना गरिएको चुनावी सभालाई सम्बोधन गर्दै श्रेष्ठले चितवन–२ का मतदाताले स्थानीय उमेदवार र सुखदुःखको साथी आफूलाई निर्वाचित गराउन संकल्प गरिसकेको बताएका छन् ।

उनले भने, ‘यहाँ उपचुनाव हुन्छ भनेर हामीले परिकल्पना गरेका थिएनौँ । विशेष परिस्थितिले यो उपचुनाव हुँदै छ । मैले यसमा के गर्ने भनेर मेरो आत्मलाई सोधेँ– यो उपचुनाव जीतनारायण श्रेष्ठका लागि हुँदै छ । त्यसपछि पार्टीका साथीहरूसँग सोधेँ सर्वसम्मत स्वीकार भयो । केन्द्रबाट मेरै नाममा निर्णय भयो ।’

उनले आफूले गरेको काम सबैलाई थाहा भएको भन्दै चितवनवासीको सेवाका लागि सांसद बन्न प्रतिस्पर्धामा उत्रिएको बताए । ‘व्यावसायिक घरानामा हुर्किएको मान्छे हुँ, व्यवसायी बन्न सक्थेँ । मैले मास्टर डिग्री गरेको छु, पढाएर खान सक्थेँ । तर, बुवाको सुझाव र आफ्नो इच्छाले समाजसेवाका लागि राजनीतिमा छु । चितवनवासीको सुखदुःखमा सँगसँगै छु,” श्रेष्ठले भने ।