खसी चोरीकाे आराेपमा एमाले कार्यकर्ता पक्राउ

२४ चैत, काभ्रे । प्रहरीले नेकपा (एमाले)का ३ जना कार्यकर्तालाई खसी चोरीको आरोपमा पक्राउ गरेको छ । उनीहरुलाई अरनिको राजमार्गअन्तर्गत भक्तपुरबाट यही चैत १६ गते राति पक्राउ गरिएको काभ्रे प्रहरीले जनाएको छ । 

प्रहरीका अनुसार काभ्रेको हिकुवापाटीबाट मध्येरातमा खसी चोरी ट्याक्सीमा राखेर भक्तपुरतर्फ ल्याउँदै गर्दा एउटा खसीसहित पक्राउ गरिएको हो । उनीहरुलाई हाल तत्काल पक्राउ गरी बनेपास्थित इलाका प्रहरी कार्यालयको हिरासतमा राखेर अनुसन्धान गरिरहेको छ । कार्यालयको नेतृत्वका रेशम बोहराले गरिरहेका छन् । 

घटनामा संलग्न ४ जनामध्ये ३ जनलाई पक्राउ गरिएको हो । पक्राउ पर्नेमा रामेछापको दोरम्बा शैलुङ गाउँपालिका–७ पुँडीका साइला भनिने मिलन तामाङ र सोही गाउँपालिका वडा नं. ४ टेक्सिङका साइला भनिने सुमन तामाङ तथा रामेछापकै दिलबहादुर कार्की रहेको जनाइएको छ । सुमन चोरीका खसी बोक्न प्रयोग गरिएका ट्याक्सी चालक रहेकाे र मिलन चोरीमा खटिने व्यक्ति भएको खुलेको प्रहरीले जनाएको छ । साथै चाेरीमा प्रयाेग गरिएका बा २ ज ४३२७ नम्बरको ट्याक्सी पनि प्रहरीले नियन्त्रणमा लिएको छ ।

कार्की भने सूर्यविनायक बजारका मासु पसले हुन् । उनले चोरी गरी ल्याइएका खसी बोका खरिद गरी मासु बिक्री गर्दै आएको खुलेको छ । उनीहरुविरुद्ध भक्तपुरको काँक्रोबारी, काभ्रेको हिकुवापाटी, नमोबुद्ध लगायत क्षेत्रका स्थानीयबाट खसी र बोका चोरी गरेको उजुरी आउने क्रम जारी रहेको प्रहरीले जनाएको छ । खसी चाेरी काठमाडाैंतर्फ लगिरहेकाे सूचनाका आधारमा उनीहरूलाई भक्तपुर प्रहरीले पक्राउ गरेकाे जनाइएकाे छ ।

उनीहरुले अहिलेसम्म २५ भन्दा बढी संख्यामा खसी र ६ वटाभन्दा बढी बोका चोरी गरेको उजुरी परेको जनाइएको छ । चोरीमा संलग्न सोही गाउँपालिका–४ का एक युवक भने फरार रहेको बताइएको छ । उनीहरुको खोजी भइरहेको प्रहरीले जनाएको छ । 

पक्राउ परेका मिलन स्थानीय चुनावमा सोही गाउँपालिकामा एमाले उम्मेदवार टंकप्रसाद चौलागाईँ र संघ तथा प्रदेश चुनावमा संघीय सांसद उम्मेदवाकैशाल ढुंगेल र प्रदेश उम्मेदवार मिलन घिसिङका कोर टिममा बसेर खटिएका विश्वासिला कार्यकर्ता हुन् । उनी एमालेनिकट ठेकेदार लखनपुरका रत्न गौतमका सहयोगी समेत रहेको बुझिएको छ । उनी एमालेका सोही गाउँपालिका सदस्य हुन् ।

सुमन स्थानीय चुनावका बेला वडा ४ मा एमालेबाट सदस्य उम्मेदवार बनेका औतार सिं तामाङका सहयोगी बनेर खटिएको खुलेको छ । चुनावमा उनले भाडा लिएर खसी चोरीकाे आराेपमा आफ्नाे माेटरसाइकलमा राखेर प्रचारप्रसार स्थानमा पुर्याउने काम गरेका थिए । चुनावपछि उनी ट्याक्सी निकालेर चलाउँदै आइरहेको बुझिएको छ ।