भारतमा एकैदिन ६ हजारमा कोरोना पुष्टि, संक्रमितको संख्या २८ हजार नाघ्यो

२४ चैत, काठमाडौं । भारतमा एके दिन ६ हजार जनामा कोरोना भाइरस संक्रमणको पुष्टि भएको छ । केही दिनदेखि बढ्दो क्रममा रहेको कोरोना संक्रमण पछिल्लो २४ घण्टामा थप ६ हजार ५० जनामा संक्रमण पुष्टि भएको हो ।

योसँगै भारतमा सक्रिय संक्रमितको संख्या २८ हजार नाघेको छ । यसअघि गत वर्ष सेप्टेम्बर १६ मा एकदिनमा ६ हजार २ सय ९८ जनामा संक्रमण पुष्टि भएको थियो ।

यसअघि बिहीबार भारतमा ५ हजार ३ सय ३५ जनामा संक्रमण पुष्टि भएको थियो । पछिल्लो २४ घण्टामा कोरोनाबाट भारतमा १४ जनाको मृत्यु भएको छ । पछिल्लो समय भारतमा कोभिड-१९ को नयाँ भेरियन्ट ओमिक्रोन एक्सबीबी।१।१६ फैलिइरहेको छ । भारतमा जनवरीमा पहिलो पटक उक्त भेरियन्ट देखिएको  भारतीय सञ्चारमाध्यमले जनाएका छन् ।