वैदेशिक राेजगारमा ज्यान गुमाएका नेपालीको बीमा रकममा ठगी गर्ने गिरोह पक्राउ

२४ चैत, काठमाडौं । वैदेशिक रोजगारका क्रममा ज्यान गुमाएका नेपालीहरूका परिवारलाई दिइने बिमावापतको रकम खाने गिरोहका ६ जनालाई प्रहरीले पक्राउ गरेको छ । 

उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको टोलीले उनीहरुले पक्राउ गरेको हो । पक्राउ पर्नेहरुमा सर्लाहीका रूद्रमान गोले, प्रकाशबहादुर गोले, रवीन्द्र मोक्तान, विनोदकुमार लामा, डिकबहादुर मल्ल र काभ्रेका रामबहादुर तामाङ रहेका छन् । उनीहरूलाई बिहीबार काठमाडौंको गोंगबुबाट पक्राउ गरिएको हो । पक्राउ पर्नेमा वैदेशिक रोजगारका बोर्डका नायब सुब्बा समेत रहेका छन् ।

बीमा रकममा आफूहरू ठगिएको भन्दै दुई जनाले प्रहरीमा उजुरी गरेपछि कार्यालयले अनुसन्धान सुरू गरेको थियो । कार्यालयका प्रमुख एसएसपी मनोज केसीका अनुसार गिरोहका सदस्यहरू विदेशमा मृत्यु भएका व्यक्तिको शव आउने दिन विमानस्थलसम्म पुग्ने र बिमाको रकम उपलब्ध गराइदिने आश्वासन दिने धन्दा चलाउँथे । त्यसपछि मृतक परिवारका सदस्यलाई उनीहरूले काठमाडौंका होटलमा राखेर सबै कागजात आफैंसँग लिइ बीमाको प्रक्रिया अघि बढाउने र रकम प्राप्तपछि थोरै रकम मात्र मृतक परिवारका सदस्यलाई दिने गरेको खुलेको प्रहरीले जनाएको छ । ठगिनेमा धेरैजसो मधेश प्रदेशका रहेका छन् । 

बीमाबापत् १४ लाख रुपैयाँ पाउँदा परिवारका सदस्यलाई ६ लाखसम्म मात्र दिने गरिएको पाइएको छ । शव नेपाल आइनपुग्ने समय र मिति भने वैदेशिक रोजगार बाेर्डकै कर्मचारीबाट संकलन थरेर धन्दा चलाउँदै आएको खुलेको छ । धन्दा चलाउनेमा ठूलै गिरोह सक्रिय रहेको र एक जनाको शव आउँदा बोर्डका अधिकारीलाई २५ हजार रुपैयाँसम्म दिने गरिएको पाइएको छ । गिरोहले  घटनाबारे आवश्यक अनुसन्धान भइरहेको प्रहरीले जनाएको छ ।