रास्वपाका सांसद ढाकाकुमार श्रेष्ठलाई २४ घण्टे स्पष्टीकरण

२६ चैत, काठमाडौं । घुस मागसम्बन्धी अडियाेमा तानिएका राष्ट्रिय स्वतन्त्र पार्टी (रास्वपा) ले पार्टीका समानुपातिक सांसद ढाकाकुमार श्रेष्ठलाई २४ घन्टाभित्र स्पष्टीकरण दिन निर्देशन दिएको छ । मेडिकल व्यवसायी दुर्गा प्रसाईंसँग २ करोड मागेको अडिओ सार्वजनिक भएपछि पार्टीले उनलाई २४ घन्टे स्पष्टीकरण सोधेको हो । 

पार्टी महामन्त्री तथा प्रवक्ता मुकुल ढकालले एक विज्ञिप्ति निकाल्दै उक्त अडिओबारे पार्टीको गम्भीर ध्यानाकर्षण भएको बताएका छन् । साथै, यो छानबिन पूरा नभएसम्मका लागि उनको सांसद तथा पार्टीको साधारण सदस्यको रुपमा काम गर्न नपाउने समेत निर्देशन दिइएको ढकालले बताएका छन् । 
‘यो छानबिन पूरा नभएसम्मका लागि सांसद तथा पार्टीको साधारण सदस्यका हैसियतले समेत कुनै पनि काम कारवाही नगर्न नगराउन समेत डा। श्रेष्ठलाई निर्देशन दिइएको छ,’ विज्ञप्तिमा भनिएको छ ।

उक्त टेलिफोन वार्ताका सम्बन्धमा सत्यतथ्य छानबिन गरी ३ दिनभित्र केन्द्रीय समितिमा प्रतिवेदन पेश गर्न पार्टीको केन्द्रीय अनुशासन तथा आचरण समितिलाई निर्देशन दिइएको रास्वपाले जनाएको छ ।

श्रेष्ठले भने उक्त अडियो आफ्नो नभएको दाबी गरेका छन् ।