नक्सा पासबारे समिट होटल अझै चुप, भन्यो- ‘जमिन भासिँदा स्थानीयको आवासमा सामान्य असर’

२७ चैत, ललितपुर । नक्सा पास र वातावरण प्रभाव मूल्यांकन (ईआईए) विषयमा विवाद चलिरहेकै अवस्थाबीच होटल संचालनका लागि भवन निर्माणको काम बढाएका कारण छिमेकी घरमा क्षति पुगेको घटनामा समिट होटलले सोमबार घटनाबारे विज्ञप्ति निकालेको छ । 

समिट होटल प्रालिका प्रोजेक्ट संचालक संचित श्रेष्ठले एक प्रेस विज्ञप्ति जारी गर्दै नक्सा पास र ईआईए विवरण ललितपुर महानगरपालिकालाई बुझाउन बाँकी रहेको जनाएका छन् । उनले उक्त विवरण छिट्टै बुझाउने सहमति भएको बताएका छन् ।

नक्सा पास र ईआईए बिना भवन निर्माण थालेको भन्दै संचारमाध्यममा समाचार आएपनि बेवास्ता गर्दै आइरहेका थिए । तर गत शुक्रबार राति भवन बनाउन खानिएको खाडलका कारण वरपरका घर र सडक भासिएर गम्भीर क्षति पुगेपछि मात्र संचालकको ध्यान पुगेको हो । 

चौधरी ग्रुपको लगानीमा ईआईएबिनै ललितपुर महानगरपालिका-१ कुपण्डोल हाइटमा समिट हाेटल रहेकाे स्थानमा संभावित घटनाबारे आँखा चिम्लेर सिडेन्सीका लागि निर्माणकाे काम सुरू गर्दा छिमेकी र सरकारी सम्पत्तिमा ठूलो क्षति पुगेको छ । 

संचालक श्रेष्ठले विज्ञप्तिमा घटनाबारे अध्ययन र क्षतिपूर्तिबारे निर्माण कम्पनी, स्थानीय र जनप्रतिनिधिसमेतको रोहवरमा छलफल भइरहेको जनाएका छन् । उनले निर्माण कार्यबाट ‘स्थानीयवासीको आवासमा असर पुगेको’ उल्लेख गरेर घटनालाई सामान्यकीकरण गर्न खोजेका छन् । नक्सा पास र ईआईएबारे मौन /रहेकाे विज्ञप्तिले नक्सासम्बन्धी मामिला काठमाडौं उपत्यका विकास प्राधिरकणको भएको उल्लेख गरेका छन् ।