मलेसियामा मेनपावर व्यवसायी राईको मृत्यु प्रकरणको छानबिन गर्न प्रधानमन्त्रीलाई पत्र

२७ चैत, काठमाडौं । मलेसियामा भएको मेनपावर व्यवसायी रेञ्जी राईको ज्यान गएकाे घटनाबारे छानबिन गर्न माग गर्दैै राईकी श्रीमती ईन्द्रसुब्बा राईले प्रधानमन्त्री प्रचण्डलाई पत्र बुझाएकी छन् । 

शान्तिनगरमा रहेको मार्भलस इम्प्लोईमेन्टका सञ्चालक ४६ वर्षीय राईको यही चैत् २४ गते मलेसियामा मृत्यु भएको थियो । उनी ७ दिन अगाडि मात्र मलेसया पुगेका थिए । उनको शव मलेसियाको निलाईस्थित स्टार डोमेन रिसर्चस् कम्पनीको लामान युनिभसिर्टीको शौचालयमा झुन्डिएको अवस्थामा फेला परेका थिए । मृत्यु आत्महत्याबाट भएको बताएपछि श्रीमतीले घटनाको छानबिन गर्न माग गरेकी हुन् । उनले मृत्यु हत्याबाट भएको दाबी गरेकी छन् । 

झण्डै २ दुई महिना पहिले सिनामंगलस्थित निमा तामाङको रोज ह्युमन रिसोर्स र राईको मेनपावर कम्पनीले मलेसियाको स्टार डोमेन रिसोर्सस् कम्पनीमा ६४ जना कामदार पठाएका थिए । 

ती कामदारहरूलाई उक्त कम्पनीले काममा नलगाउने र पारिश्रमिक समेत नदिएको भन्दै कामदारहरूले बारम्बार गुनासो आएपछि बुझ्न उनी मलेसिया पुगेको बताइन्छ । त्यहाँ एजेन्ट शंकरप्रसाद आचार्य, महेन्द्रजंग शाही र मलेसियाको स्थानीय एजेन्ट स्वन लीसँग चर्काचर्की परेको र त्यसपछि श्रीमान्को मृत्यु भएको घटना बाहिर आएको दाबी छ । 

श्रीमानको  उक्त शौचालयको तस्बिर र भिडियो हेर्दा आत्महत्या नभई कुनै आपराधिक गिरोहले हत्या गरी शौचालयमा झुण्ड्याइदिएको र अपराध छल्न आत्महत्याको नाटक रचेको उनको दाबी छ । एजेन्टहरुलाई अनुसन्धानको दायरामा ल्याउन उनले माग गरेकी छन् । 

निवेदन परेपछि परराष्ट्र मन्त्रालयलाई छानबिन गर्न पत्राचार गरिसकेको प्रधानमन्त्रीको सचिवालयले जनाएको छ ।