सुत्केरी मृत्युको घटनालाई लिएर अत्तरियामा राजमार्ग अवरुद्ध

२८ चैत, धनगढी । कैलालीको अत्तरियास्थित मालाखेती अस्पतालमा भएको एक सुत्केरी र शिशुको मुत्यु घटनालाई लिएर आफन्त र पीडित परिवारका सदस्यहरुले पूर्व–पश्चिम राजमार्ग बन्द गराएका छन् ।

उनीहरुले सुत्केरी र उनका शिशुको मृत्यु चिकित्सकको लापरवाहीले भएको भन्दै दोषीलाई कारवाहीको माग गर्दै मंगलबार पनि कार्यालय समयमा राजमार्ग बन्द गराएका छन् । उनीहरुले राजमार्ग अवरुद्ध पारेर प्रदर्शन गरिरहेका छन् । सोमबार पनि राजमार्ग अवरुद्ध गरेका थिए । अहिले अत्तरियामा क्षेत्र तनाव सिर्जना भएको छ । सुरक्षाकर्मी बाक्लो संख्यामा परिचालन गरिएको छ । 

सोमबार सुत्केरी गराउने क्रममा जिल्लाको गोदावरी नगरपालिका–२ की २८ वर्षीया सुत्केरी लक्ष्मी भट्टराई र शिशुको मृत्यु भएको थियो । आन्दोलित आफन्त र स्थानीयले घटनाको छानबिन गर्न समिति गठन गर्ने, मृतकका परिवारलाई नगरपालिकाबाट क्षतिपूर्ति उपलब्ध गराउने लागयत माग कार्यान्वयन नभएको भन्दै आक्रोश पोखेका छन् । 

अवरुद्ध पूर्व– पश्चिम राजमार्ग खुलाउने प्रयास भइरहेको कैलालीका प्रमुख प्रहरी उपरीक्षक (एसपी) देबेन्द्रबहादुर पालले बताए ।