प्रधानमन्त्रीको भारतभक्ति देखेर अचम्म लागेको छ : सांसद गैरे

२९ चैत, काठमाडौं । एमाले सांसद ठाकुरप्रसाद गैरेले प्रधानमन्त्री पुष्पकमल दाहाल ‘प्रचण्ड’ भ्रमणको निम्तो आइनसक्दै भारत भ्रमणका लागि बाटो हेरिरहेको भन्दै आपत्ति जनाएका छन् । 

बुधबार प्रतिनिधिसभाको बैठकमा विशेष समयमा बोल्दै निमन्त्रणा नै नआएको बेला बोआओ सम्मेलन रद्द गरेर भारत भ्रमणको तयारी भइरहेको सुनेको भन्दै भारतले भ्रमणको निम्तो नै नदिइरहेको अवस्थामा पनि भ्रमणको बाटो कुर्ने प्रधानमन्त्रीको तरिकाले भारतभक्ति छर्लङग भएको बताए । 

उनले भारत भ्रमण गर्दा नेपाली भूमि लिम्पिधुरा, लिपुलेकमा बसिरहेको भारतीय सेना फर्काउने र भूमि फिर्ता गराउने विषयलाई एजेण्डा बनाउनुपर्ने बताए । मुलुकको कार्यकारीबाटै भारतभाव प्रकट हुनु स्वाधीनताको दृष्टिले दुःखद भएकाे बताए ।