सांसद दीपक सिंहको प्रश्न : ‘अख्तियारले कहिलेसम्म खुट्टा कमाउने ?’

६ वैशाख, काठमाडौं । बुधबार बसेको प्रतिनिधिसभाको विशेष समयमा बोल्दै राप्रपाका सांसद दीपकबहादुर सिंहले अख्तियार अनुसन्धान दुरुपयोग आयोगले खुट्टा कमाएको बताएका छन् । 

उनले प्रधानमन्त्रीनिवास बालुवाटारको निजीकरण, सांसदको घुस रकम माग, राष्ट्रिय परिचय पत्रको लगत राख्नेबारे मन्त्रीस्तरीय निर्णयको खारेजीबारे अख्तियारले तत्काल कारवाही अगाडि बढाउनुपर्ने धारणा राखे । 

उनले नीतिगत रुपमा भ्रष्टचारमा संलग्न जोकोहीलाई कारवाहीको दायरामा ल्याउन सरकारको ध्यानाकर्षण गराए । मुलुकलाई भ्रष्टाचार र अस्थिरताको दलदलमा फसाउने किसिमबाट भएका सम्पूर्ण निर्णयमाथि आयोगबाट अनुसन्धानबाट सुरु हुनुपर्ने बताए । 

‘गलत निर्णय र कामको अनुसन्धान गर्न अख्तियारले कहिलेसम्म खुट्टा कमाउने ?’ उनले बैठकमा प्रश्न गरे । नागरिकको व्यक्तिगत र जैविक विवरणको अभिलेख राख्ने विषयलाई विदेशी कम्पनीलाई दिने गृहमन्त्रालयको विगतका निर्णयमाथि छानबिन हुनुपर्ने उनको माग छ ।