भ्रष्टाचारीलाई सर्वश्वहरणसहित आजीवन कैदको व्यवस्था गर्नुपर्नेमा जाेड

१२ वैशाख, काठमाडौं । मंगलबार बसेको प्रतिनिधि सभाको बैठकमा ‘भ्रष्टाचार निवारण पहिलो संशोधन विधेयक, २०७७’ माथिको छलफलमा धारणा राख्ने सांसदहरुले भ्रष्टाचारीलाई सर्वस्वहरणसहित आजीवन कैद साजयको व्यवस्था राख्नुपर्ने बताएका छन् । 

प्रमुख प्रतिपक्ष नेकपा (एमाले)का प्रमुख सचेतक समेत रहेका सांसद पदम गिरिले भ्रष्टाचार गर्नेलाई कडा सजाय दिने र समाजमा शिर उँचो बनाएर हिंडन नसक्ने किसिमका व्यवस्था विधेयकमा राख्नुपर्ने बताए । 

उनले करोडौं र अर्बौं  रुपैयाँ भ्रष्टाचार गर्नेले १४ वर्ष भन्दा बढी जेलमा बस्नु नपर्नेगरी राख्न खोजिएको प्रावधान हटाउन समेत माग गरे । ‘यो प्रावधानले पुग्दैन । सर्वश्वहरणसहित आजीवन जेल सजाय हुनुपर्छ’ उनले भने । 

भ्रष्टाचारले व्यक्ति धनी र देश कंगाल भएको बताउँदै जनतामा छाएको निराशा हटाउन पनि भ्रष्टाचारीलाई कडा कारवाहीको कानुनी व्यवस्था गर्नुपर्ने बताए । उक्त विधेयक सन्देशसहित राष्ट्रियसभाबाट छलफलमा फिर्ता आएको हो ।