चितवनका पोल्ट्री व्यवसायी कँडेल आत्महत्या प्रकरणमा २ जनाविरुद्ध पक्राउ पुर्जी

२१ वैशाख, चितवन । पोल्ट्री व्यवसायी श‌ंकर कँडेलको आत्महत्या प्रकरणका २ जनालाई आत्महत्या दुरुत्साहन कसुरमा अनुसन्धानका लागि प्रदीप रुँगटा र जीवन रावलविरुद्ध जिल्ला अदालत चितवनबाट  पक्राउ पुर्जी जारी भएको छ । 

मृतकका परिवारले दिएको किटानी जाहेरीका आधारमा पक्राउका लागि प्रहरीले अदालतबाट पक्राउका लागि पुर्जी लिएको हो । डेढ दशकदेखि उनले यो फिड्स चलाउँदै आएका ५२ वर्षीय कँडेल मंगलबार साँझ आफ्नै कार्यालय नारायणगढमा मृतावस्थामा भेटिएका थिए ।

कँडेलले आत्महत्या गर्नुको कारण कम्पनीको ८५ प्रतिशत सेयर खरिद गरेका व्यवसायी प्रदीप रुँगटा र कँडेलकै कम्पनीमा कार्यरत लेखा प्रमुख जीवन रावल रहेको जाहेरी परेको छ । दुवै जना फरार छन् । शेयर बिक्रीपछि आन्तरिक हिसाब मिलानका क्रममा रुँगटा र रावलले मानसिक दबाब दिएको सुसाइट नोटमा उल्लेख भएको बताइएको छ । 

उनीहरूलाई पक्राउका लागि केन्द्रीय अपराध नियन्त्रण महाशाखा, सीआईबी, सिमानाका लगायतमा खबर गरेर देशभरका प्रहरी युनिटसँग समन्वय  भइरहेको जिल्ला प्रहरी कार्यालयका प्रमुख प्रहरी उपरीक्षक रामेश्वर कार्कीले बताए ।

पक्राउ गर्न माग गर्दै पीडित परिवार र चितवनका उद्योगी व्यवसायी संस्थाहरूले जिल्ला प्रहरी कार्यालय र प्रशासन कार्यालयमा ज्ञापनपत्रसमेत बुझाएका छन् । उनीहरूले आज बिहान साढे ११ बजे कार्यालय अगाडि धर्ना समेत दिएका छन् ।