नेपाली नागरिकता लिन झुटा विवरण बुझाउने १० भारतीय प्रहरीको नियन्त्रणमा

२४ वैशाख, काठमाडौं । झुटा नेपाली नागरिकता लिएको आरोपमा प्रहरीले १० जना भारतीय नागरिकलाई नियन्त्रणमा लिएको छ । नियन्त्रणमा परेकामध्ये ७ पुरूष र ३ महिला छन् ।

भारतको उत्तर प्रदेशका स्थायी बासिन्दा भएपनि उनीहरुले नक्कली कागजात पेश गरेर मधेश प्रदेशका विभिन्न जिल्लाबाट नेपाली नागरिकता लिएको पाइएको काठमाडौं उपत्यका अपराध अनुसन्धान कार्यालयले जनाएको छ । 

करिब ३ महिना लामो अध्ययनपछि उनीहरुले पर्सा, बारा, सिरहा, रुपन्देहीलगायतका जिल्लाबाट नेपाली नागरिकता लिएको पाइएको र अनुसन्धानका लागि कठमाडौंबाट पक्राउ गरिएको प्रहरीले जनाएको छ । उनीहरुलाई काठमाडौंको कलंकी, संखमुल, ललितपुरको पाटन लगायतका क्षेत्रबाट पक्राउ गरिएको हो । 

नेपालमै मजदुरी र व्यवसायी गर्दै आइरहेका उनीहरुको साथबाट नेपालको मतदाता परिचय पत्र र भारतीय परिचय पत्र पनि बरामद भएको प्रहरीले जनाएको छ । उनीहरूले वंशजकाे नागरिकता लिएकाे पाइएकाे छ । घटनामाथि आवश्यक अनुसन्धान भइरहेको जनाएको छ ।

उनीहरूलाई आइतबार पत्रकार सम्मेलन गरेर सार्वजनिक गरियाे ।