किन गराए प्रधानमन्त्री प्रचण्डले आईजीपीको अमेरिका भ्रमण रद्द ?

२५ वैशाख, काठमाडौं । प्रधानमन्त्री पुष्पकमल दाहाल 'प्रचण्ड'ले आईजीपी बसन्त बहादुर कुवँरको अमेरिका भ्रमण रोकेका छन् । आईजीपी भएपछि पहिलो विदेश भ्रमण तय भएकोमा प्रधानमन्त्री प्रचण्डले तत्कालै सो भ्रमण रद्द गरेर अरूलाई पठाउन आदेश दिएका थिए । यति बेला मुलुकमा नक्कली भूटानी शरणार्थी प्रकरणमा अनुसन्धान चलिरहेको भन्दै उनको भ्रमण रोकिएको हाे । अमेरिकामा हुने लिडरशिप एक्सचेन्ज कार्यक्रममा भाग लिन जान लागेका आईजीपी वसन्त कुँवरको भ्रमण रोकिएकाे हो । सो कार्यक्रममा भाग लिन नेपाल प्रहरीका एआईजीसहितको टोलीलाई पठाइएको छ । 

भुटानी शरणार्थी बनाएर नेपाली नागरिकलाई अमेरिका लैजाने भन्दै भएको ठगी प्रकरणका प्रहरीले अनुसन्धान गरिरहेको र सो अनुसन्धान प्रभावित हुनसक्ने भन्दै आईजीपीलाई सरकारले भ्रमण अनुमति नदिएको हो । ‘आइतबार साँझ मात्रै आईजीपीको भ्रमणमा रोक लगाइएको हो, प्रहरीले हतारमा अर्को निर्णय गर्नुपर्यो, एआईजी किरण बज्राचार्यको नेतृत्वमा अर्को टोली पठाइएको छ’, प्रहरी प्रधान कार्यालय स्रोतले भन्यो । आईजीपी कुँवरको भ्रमण रद्द भएपछि एआईजीको नेतृत्वमा पाँच सदस्यीय टोली अमेरिका प्रस्थान गरेकाे छ । एआईजी बज्राचार्यको नेतृत्वमा टोली पठाइएको नेपाल प्रहरीले जनाएको छ । टोलीमा प्रहरी अतिरिक्त महानिरीक्षक सुदीप गिरी, प्रहरी नायव महानिरीक्षक रामदत्त जोशी, प्रहरी वरिष्ठ उपरीक्षक  चन्द्र बहादुर धामी र प्रहरी उपरीक्षक सन्तोष खड्का रहेका छन् । 

वैशाख २७ देखि २९ गतेसम्म संयुक्त राज्य अमेरिकाको वासिङ्टन डिसी र न्यूयोर्कमा सञ्चालन हुने उक्त कार्यक्रममा भविष्यमा हुने सुरक्षा चुनौती र आतंकवाद, डिजिटल अपराध, क्रिप्टोकरेन्सी कारोबार लगायतका वित्तीय अपराध अनुसन्धान तथा नियन्त्रण र यससम्बन्धि ज्ञान तथा अनुभव आदान प्रदान जनाइएको छ ।

‘आईजीपीको भ्रमण अचानक रद्द भयो, प्रधानमन्त्रीले नै उहाँलाई मुलुक बाहिर नजान निर्देशन दिनु भएको हो’, प्रहरी प्रधान कार्यालय स्रोतले भन्यो । नक्कली भूटानी शरणार्थी प्रकरणमा यति बेला पूर्व उपप्रधानमन्त्री तथा एमाले सचिव टोपबहादुर रायमाझी फरार छन भने पूर्व गृहमन्त्री बालकृष्ण खाँण पनि शंकाको घेरामा तानिएका छन् । त्यसै गरी कांग्रेस सभापति शेरबहादुर देउवा पत्नी आरजु देउवा र खाँणपत्नी मञ्जु खाँणले पनि करोडौं रुपैयाँ लिएको भन्दै अडियो सार्वजनिक भएको छ । जसले गर्दा प्रचण्डले अनुसन्धान प्रभावित न होस भन्ने हेतुले उनको भ्रमण रद्द गरेको स्रोतको दावी छ ।