नक्कली शरणार्थी प्रकरणले प्रधानमन्त्रीको विदेश भ्रमणमाथि प्रश्न ?

२७ बैशाख, काठमाडौं । नेपालीलाई नक्कली भुटानी शरणार्थी बनाएर अमेरिका पठाएर ठगी गरेको प्रकरणले  प्रधानमन्त्री पुष्पकमल दाहाल प्रचण्ड विदेश भ्रमणमा समेत असर पार्ने भएको छ । प्रधानमन्त्री प्रचण्ड छिमेकी मुलुक भारत र चीन भ्रमणमा जाने तयारी गरिरहेका छन् । दुवै देशले नेपालको ठगी प्रकरणको अनुसन्धानमा राजनीतिक दलका नेताहरुको सम्लग्नतामाथि चासो राखिरहेका छन् । 

परारष्ट्र मामिलाका जानकारहरुले नक्कली शरणार्थी बनाएर अमेरिक पठाएको विषयको कारवाहीमाथि शक्तिराष्ट्रसहित विश्वले हेरिरहेकाले भारतले पनि यसबारे चासो दिइरहेको बताएका छन् । उनीहरुको भनाइमा यो विषयकको अनुसन्धानलाई लिएर भ्रमणका समयमा प्रश्नहरु आउन सक्छन् । यसका लागि प्रधानमन्त्रीले कूटनीतिक संयन्त्रको प्रयोग गर्नुपर्छ । 

यतिबेला परराष्ट्र मन्त्रालयले प्रधानमन्त्रीको भारत र चीन भ्रमणका लागि गृहकार्य गरिरहेको छ । भारत भ्रमणको मिति टुंगिँएपछि चीन भ्रमणमा जाने तयारी छन् प्रधानमन्त्री प्रचण्ड । उनले प्रधानमन्त्री भएदेखि नै भारत भ्रमणको तयारी गरेका थिए । तर, अहिले सम्म मिति तय भएको छैन् । सुरुमा भारत भ्रमण गर्ने र फर्केपछि अर्को छिमेक चीन भ्रमण जाने प्रधानमन्त्रीको तयारी रहेको छ । 

प्रधानमन्त्रीको भारत भ्रमणको मिति तय नभएर त्यसका लागि आवश्यक तयारी भइरहे पनि चीनबाट भने निमन्त्रणा आइसकेको परराष्ट्र मन्त्रालयले जनाएको छ । प्रधानमन्त्रीको भारत भ्रमण वैशाख अन्तिम सातादेखि जेठको पहिलो सातासम्म हुने अपेक्षा भए पनि मिति तय भएको छैन । जेठ पहिलो सातासम्म हुन नसके सरकारको नीति तथा कार्यक्रम र बजेटभन्दा पछि मात्र हुनेछ । त्यति बेलासम्म ठगी प्रकरणको अनुसन्धानले एक रुप लिने प्रधानमन्त्रीको अनुमान छ ।