नक्कली भुटानी शरणार्थी प्रकरण छानबिनमा हस्तक्षेप नगर्न माग गर्दै काठमाडौंमा प्रदर्शन

७ वैशाख, काठमाडौं । नक्कली भुटानी शरणार्थी बनाएर ठगी गरेको प्रकरणमाथिकमो छानबिन नरोक्न र प्रकरणका दोषी सबैलाई कानुनी दायरामा ल्याउन माग गर्दै दबाबस्वरुप नागरिक अगुवा तथा पेशाकर्मीहरुले काठमाडौंमा बुधबार प्रदर्शन गरेका छन् । बृहत् नागरिक आन्दोलनको ब्यानरमा उनीहरुले खबरदारी सहित स्व:स्फूर्त प्रदर्शन गरेका हुन् । 

प्रदर्शनमा सहभागीहरूले ‘नक्कली भुटानी शरणार्थीको काण्डको सक्कली छानबिन होस्, ‘खोई कर भ्रष्टाचारको पेटमा’,  ‘मानव तस्करीको दश हात, टोपबहादुरलाई ओलीको साथ’ लगायत नारा लेखिएका प्लेकार्ड प्रदर्शन गरे ।

प्रदर्शनपछि विरोधसभा आयोजना गरिएको थियो । सभालाई सम्बोधन गर्दै डा. गोविन्द केसीले नक्कली शरणार्थी प्रकरणमा मुछिएका सबैलाई कारवाही गर्नुपर्ने, राजनीतिक दबाब र पहुँचका आधारमा दोषीले उन्मुक्ति पाउन नहुने बताए । राजनीतिक नेतृत्वको दबावमा नझुक्न प्रहरीलाई आग्रह गरेका छन् ।

नक्कली भुटानी शरणार्थी प्रकरणमाथि अनुसन्धानमा नेपाली कांग्रेस र नेकपा एमालेका उच्च तहका नेताहरू तानिएका छन् । यसबीचमा कांग्रेस सभापति शेरबहादुर देउवा, एमाले अध्यक्ष केपी शर्मा ओलीले प्रधानमन्त्री र गृहमन्त्रीसँग भेटवार्ता र छलफल जारी राखेपछि नागरिक अगुवाहरु छानिबन प्रभावित हुन नदिने उद्देश्यले प्रदर्शनमा उत्रिएका हुन् । प्रदर्शनमा पेशाकर्मी, अधिकारकर्मी, राजनीतिज्ञ, चिकित्सक तथा वृद्ध, महिलाहरु ठूलो संख्यामा सहभागी थिए । उनीहरूले ‘नक्कली भुटानी शरणार्थी काण्ड सक्कली तरिकाले छानबिन होस्’ लेखिएका प्लेकार्ड बोकेका थिए ।

दबाब र पहुँचका कारण छानबिन रोकिने र सामसुम पार्ने काम भएमा कडा संघर्ष घोषणा गरेर अगाडि बढ्ने प्रदर्शनकारीहरुले बताए । प्रकरणको अनुसन्धानका क्रममा हालसम्म प्रहरीले कांग्रेस नेता एवं पूर्वगृहमन्त्री बालकृष्ण खाणसहित १ जनालाई पक्राउ गरिसकेको छ ।

एमालेका संसद टोपबहादुर रायमाझीसहित ३ जना फरार छन् । एमालेका केन्द्रीय सचिव समेत रहेका फरार रायमाझीलाई एमालेले आजै मात्र सचिवबाट निलम्बन गरेको छ ।