संसदमा प्रधानमन्त्रीको जवाफः ‘भारत भ्रमणमा देशको हितविपरीत कुनैपनि सम्झौता हुने छैन’

४ जेठ, काठमाडौं । प्रधानमन्त्री पुष्पकमल दाहाल ‘प्रचण्ड’ले निकट भविष्यमा हुने भारत भ्रमणमा देश र जनताको हितविपरीत कुनैपनि सम्झौता नहुने प्रष्टिकरण दिएका छन् ।

संघीय संसदअन्तर्गत प्रतिनिधिसभाको आजको ‘प्रधानमन्त्रीसँग सांसदको प्रश्न’मा सांसदहरुले उठाएका प्रश्नको जवाफ दिँदै प्रम प्रचण्डले छिमेकी भारतसँग नेपालको सीमा विवाद अन्त्यका लागि कूटनीतिक पहल भइरहेको जानकारी दिँदै निकट भविष्यमा हुने आफ्नो भारत भ्रमणमा देशको हितविपरीत कुनै किसिमका सम्झौता नगरिने स्पष्ट पारे । 

एमालेका सांसद रघुजी पन्तले भारत भ्रमणमा नेपाली भूमि दार्चुलाको लिपुलेक, कालापानी र लिम्पियाधुरा फिर्ता ल्याउन वार्ता हुन्छ कि हुँदैन भन्ने प्रश्नमा प्रचण्डले आफ्नो एक इन्च पनि नछाड्ने र अरुको एक इन्च पनि भूमि नलिने सरकारको नीति रहेको बताए । सोही नीतिमा टेकेर भ्रमणमा भारतसँग छलफल हुने बताए ।

विश्वास दिलाउन चाहन्छु भने नेपालको राष्ट्रिय हित, राष्ट्रिय एकता, अखण्डता र स्वाधीनतामा कुनै किसिमको सम्झौता वा कुनै भ्रम पर्न दिइने छैन’, प्रधानमन्त्रीले भने ।

प्रधानमन्त्री प्रचण्डले सीमा विवादलगायत सन् १९५० को सन्धिदेखि यताका सबै असमान सन्धि पुनरावलोकनका दुवै देशका प्रबुद्ध समूहले तयार पारेको प्रतिवेदन बुझ्ने र बुझाउने विषयमा पनि भ्रमणमा छलफल हुने उनले बताए ।