ढोरपाटनका नगरप्रमुखलाई विदेश यात्रा अनुमति रोक्न अध्यागमनमा गृहको पत्र

८ जेठ, काठमाडौं । सहकारीको बचत रकम हिनामिना गरेको आरोपपछि सम्पर्कविहीन रहेका बाग्लुङको ढोरपाटन नगरपालिकाका प्रमुख देवकुमार नेपालीलाई विदेश यात्राको अनुमति रोक्न गृह मन्त्रालयले अध्यागमन विभागलाई पत्रचार गरेको छ । 

उनी नेतृत्वको इमेज बचत तथा ऋण सहकारी संस्थाका बचतकर्ता करोडौं रुपैयाँ रकम हिना गरेको आरोप लागेपछि ४ दिनदेखि मोवाइल स्वीच्ड अफ गरेर सम्पर्कविहीन छन् । गृहको सीमा तथा अध्यागमन शाखाका शाखा अधिकृत परशुराम पोखरेलले आइतबार विभागलाई पत्र लेखेका छन् । 

पत्रमा सहकारीका अध्यक्ष समेत रहेका प्रमुख नेपाली र सहकारीका सम्पूर्ण पदाधिकारीसहित ७ जनालाई विदेश यात्राको अनुमति नदिन भनिएको छ । रकम हिनामिना गरेर विदेश भाग्न सक्ने जनाउँदै अनुमति रोक्न भनिएको हो । सहकारीले एक अर्ब भन्दा धेरै रकम भुक्तानी दिनुपर्ने छ ।

अध्यक्ष नेपालीसहित सहकारीको कार्यवाहक अध्यक्ष डोरबहादुर परियार, सचिव सुनिल नेपाली, कोषाध्यक्ष लक्ष्मी सेन, सञ्चालक चित्रबहादुर भण्डारी, सदस्य रुपा विक र अर्का सदस्य झगबहादुर शाहीको यात्राअनुमति रद्द गर्न भनिएकाे हो । 

त्रिभुवन अन्तर्राष्ट्रिय विमानस्थलसहित अन्य नाकामा पनि नेपालीलाई रोक्न प्रहरी संयन्त्र समेत परिचालन भएको सहायक प्रजिअ चित्राङगत बरालले बताए ।