मधेशमा जनमतको मन्त्रालय खोसेर एकीकृत समाजवादीलाई

९ जेठ, काठमाडौं । मधेस प्रदेशको मन्त्रिपरिषद् विस्तार हुँदैछ । मुख्यमन्त्री सरोजकुमार यादवले आज नेपाली कांग्रेसका २ जना प्रदेश सांसदलाई मन्त्री नियुक्त गर्दैछन् । 

कांग्रेस मधेस प्रदेशका सभापति समेत रहेका कृष्ण यादवले भौतिक पूर्वाधार विकास मन्त्री र कांग्रेसकै वीरेन्द्र सिंहले स्वास्थ्य मन्त्रीको रूपमा आजै शपथ लिने तयारी भएको छ । नेकपा (एकीकृत समाजवादी)ले भूमि व्यवस्था, कृषि तथा सहकारी मन्त्रालय पाएको छ । गोविन्द न्यौपाने यो मन्त्रालयको जिम्मेवारी सम्हाल्नेछन् । यो मन्त्रालय यसअघि जनमतको भाग परेको थियो । 

जनमतबाट भूमि व्यवस्था, कृषि तथा सहकारी मन्त्री रहेका वसन्त कुशवाहालाई विना विभागीय मन्त्री बनाइँदैछ । एक मन्त्रालय पाएको लोसपाले मन्त्रालयको टुंगो नलागेकाले नाम दिएको छैन ।

जनमतले मधेशमा सरकारको नेतृत्वमा आलोपालो दाबी गर्दै आइरहेका बेला मन्त्रालय खोसिएको हो । जसपाका अध्यक्ष उपेन्द्र यादव र जनमतका अध्यक्ष सिके राउतबीचको सम्बन्ध तिक्ततापूर्ण छ । गएको मंसिर ४ मा सप्तरीमा यादव राउतसँग भारी मतले पराजित भएपछि तिक्तता झनै बढेको छ ।

यसपछि वैशाख १० मा भएको उपनिर्वाचनमा बारा २ मा राउका उम्मेदवारसँग यादव मुश्किलले विजयी भएका छन् । यसपछि राउतले आफ्नो दल तराईमा उदय भएको, अब कसैले रोक्न नसक्ने बताएका छन् ।