गुणस्तर तथा नापतौल कार्यालयका नासु यादवको चार करोड अतिरिक्त सम्पत्ति

२२ जेठ, काठमाडौं । गुणस्तर तथा नापतौल कार्यालय, बीरगञ्जमा कार्यरत वरिष्ठ निरीक्षक शशी भुषण कुमार यादवले नोकरी अवधिभर चार करोड रूपैयाँ अतिरिक्त आम्दानी गरेको खुलेको छ । अख्तियार दुरुपयोग अनुसन्धान आयोगले गरेको अनुसन्धानपछि यादवले नोकरीको अवधिमा कमाएको सात करोडमध्ये चार करोडको कुनै पनि स्रोत देखाउन नसकेपछि अतिरिक्त आम्दानी भएको खुलेको हो ।

अख्तियारका अनुसार विभिन्न कार्यालयमा कार्यरत रहँदा आफ्नो परिवारको नाममा जग्गा जमिन खरिद गरी गैरकानुनी रुपमा अकुत सम्पत्ति आर्जन गरेको भन्ने उजुरीमा अनुसन्धान हुँदा यादवले सार्वजनिक सेवा प्रवेश गरेको २०४६।०२।०८  देखि २०७९ साल असार मसान्तसम्मको अवधिमा सो रकम देखिएको हो ।

अख्तियारले समग्र आय व्ययको विश्लेषण गर्दा खर्च तथा लगानीतर्फ निज र निजको एकासंगोलका परिवारको नाममा जग्गा खरिद, घर निर्माण, सवारी साधन खरिद, बीमाको प्रिमियम भुक्तानी, शेयर खरिद, अध्ययन खर्च, विदेश भ्रमण, ऋण-सापटीको साँवाब्याज भुक्तानी, पारिवारिक घर खर्च, विभिन्न शीर्षकमा राजस्व-कर तिरेको र बैंक मौज्दातसमेत गरी जम्मा रु.७,२४,५६,२६३।१२ (सात करोड चौवीस लाख छपन्न हजार दुई सय त्रिसठ्ठी रूपैयाँ बाह्य पैसा) खर्च तथा लगानी गरेको देखिएको जनाएको छ ।

अख्तियारका प्रवक्ता भोला दाहालका अनुसार उनको एकासंगोलका परिवारको आय आर्जनतर्फ निजको पारिश्रमिक-तलबबाट जीवन निर्वाह खर्च कटाई बचत, जग्गा बिक्री, श्रीमतीको पारिश्रमिक वचत, कृषि आयबाट वचत, घरभाडा, बुहारीको पारिश्रमिक  वचत, वीमा फिर्ता, विदेश तालिम आयबाट वचत, ऋण सापटी, उपचार खर्च, संचित विदाको रकम, कर्मचारी संचय कोष फिर्ता रकम, नागरिक लगानी कोष, श्रीमतीको अवकाशबाट प्राप्त रकम, निजको पेन्सन आयबाट  वचत र छोराको तलव बचतसमेत दुई करोड सतहत्तर लाख बाईस हजार पचास रूपैयाँ छयासी पैसा मात्र वैद्य रहेको छ । त्यसपछि  उनको करोड सतचालीस लाख चौतीस हजार दुई सय बाह्य रूपैयाँ छब्बीस पैसा  बराबर सम्पत्ति वैधानिक स्रोत पुष्टि हुन नसकेकाले उनका विरुद्ध मुद्दा दर्ता भएको छ ।

प्रवक्ता दाहालका अनुसार भ्रष्टाचार निवारण ऐन, २०१७ को दफा १५ एवं प्रचलित भ्रष्टाचार निवारण ऐन, २०५९ को दफा २० को उपदफा (१) बमोजिमको कसुर गरेको पुष्टि हुन आएकोले  कुमार यादवउपर चार करोड सत्चालीस लाख चौतीस हजार दुई सय बाह्य रूपैयाँ छव्वीस पैसा बिगो कायम गरी साविक भ्रष्टाचार निवारण ऐन, २०१७ को दफा १५ मा उल्लेख भए बमोजिम सोही ऐनको दफा ३ एवं प्रचलित भ्रष्टाचार निवारण ऐन, २०५९ को दफा २० को उपदफा (२) बमोजिम कैद तथा जरिवानाको सजाय माग गरी मुद्दा दायर गरिएको छ ।

 स्रोत खुलेको घर, जग्गाहरु, बैंक मौज्दातसमेतका सम्पत्तिबाट साविक भ्रष्टाचार निवारण ऐन¸ २०१७ को दफा ३, दफा १६(ग)¸ दफा २९ को उपदफा (१) र प्रचलित भ्रष्टाचार निवारण ऐन¸ २०५९ को दफा २० को उपदफा (२), दफा ४७ तथा अख्तियार दुरुपयोग अनुसन्धान आयोग ऐन¸ २०४८ को दफा २९ ख. बमोजिम जफत-असुल उपर गरी पाउन माग दावी लिइएको छ ।

यसै गरी राष्ट्रसेवक यादवले सार्वजनिक सेवाको पदमा रहँदाका बखत गैरकानूनी रूपमा सम्पत्ति आर्जन गरेको स्रोत नखुल्ने सम्पत्तिबाट श्रीमती रिता रानी, छोरा द्वय विकास यादव र अविनाश यादवको नाममा खरिद गरिएका जग्गा, घर निर्माण र बैंक मौज्दातको स्रोत नखुलेको सम्पत्ति र त्यसबाट बढे बढाएको सम्पत्तिको जफत गर्ने निर्णय समेत गरिएको छ