कोशी प्रदेशमा कांग्रेसले आफ्नै नेतृत्वमा सरकार गठन गर्न पहल गर्ने

२३ जेठ, विराटनगर । नेपाली कांग्रेसले कोशी प्रदेशमा आफ्नै नेतृत्वमा सरकार गठनको पहल गर्ने निर्णय भएको छ । आजै मात्र माओवादी केन्द्र सरकारबाट बाहिरिएपछि कांग्रेसको प्रदेश संसदीय दलको आज बसेको बैठकले यस्तो निर्णय गरेको हो । 

जसपाले यसअघि नै आफ्नो एक मन्त्रीलाई फिर्ता बोलाएर सरकारलाई दिँदै आएको समर्थन फिर्ता लिइसकेको छ । माओवादी केन्द्रले पनि समर्थन फिर्ता लिएपछि एमाले नेतृत्वको प्रदेश सरकार अल्पमतमा परेको छ ।

मुख्यमन्त्री हिक्मत बहादुर कार्कीले अब ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ । प्रदेशमा सरकार गठन गर्न ४७ मत आवश्यक पर्छ । अहिले कार्कीलाई एमाले र राप्रपाका गरी ३३ मत मात्र प्राप्त छ । कार्कीसँग अब राजीनामा दिने या विश्वासको मत लिने भन्ने २ वटा मात्र विकल्प रहेका छन् । 

गत चैतमा केन्द्र सरकारमा गठबन्धनबाट एमाले बाहिर परेसँगै प्रदेशहरुमा सरकार फेरबदलको क्रम जारी छ ।

सरकारबाट बाहिरिएको माओवादी केन्द्रले पनि आफ्नै नेतृत्वमा सरकार गठन गर्न पहल गर्ने निर्णय गर्दै पहलका लागि समिति समेत बनाएको छ ।