भारतसँग पाउडर दूध होइन भैंसी नै किन्नुपर्छ : सांसद सापकोटा

२३ जेठ, काठमाडौं । नेकपा (माओवादीकेन्द्र) सांसद माधव सापकोटाले भारतसँग पाउडर दूध नभई र्भैंसी किनेर दूधमा आत्मनिर्भर बनाउनुपर्नेमा जोड दिएका छन् । सरकारले जेठ १५ मा संसदमा प्रस्तुत गरेको आगामी आर्थिक वर्ष २०८०/८१ को बजेटमाथि मंगलबार प्रतिनिधिसभा बैठकमा छलफलमा भाग लिँदै सांसद सापकोटाले यस्तो कुरा बताएका हुन् ।

उनले आफ्ना पार्टीका अध्यक्ष समेत रहेका प्रधानमन्त्री हालै भारत भ्रमणबाट फर्किँदा भैंसी लिएर आएको भनेर संसदमै भएको टिप्पणीप्रति लक्षित गर्दै यो सरकारले विगतका सरकारहरुले जसरी भारतसँग पाउडर दूध किन्ने चरित्र त्यागेर मूर्रा जातको राँगा नै ल्याएर देशभित्र नश्ल सुधार गरी दूधमा आत्मनिर्भर बनाउने कामको सुरुवात गरेको उनले बताए । सरकारले कृषि क्षेत्रलाई आधुनिक तवरले विकास गर्दै उचाइमा पुर्याउने गरी बजेट ल्याएको बताए ।

यस्तै, सापकोटाले बजेट कृषि पर्यटक प्रवद्र्धनमा बजेट नपुगेको धारणा राखे । उनले सिन्धुपाल्चोकको हेलम्बु, दोलखाको कालिञ्चोक र रामेछापको शैलुङ क्षेत्रलाई कृषि पर्यटकसँग जोडेर लैजानुपर्ने आवश्यकता औल्याए । सिन्धुपाल्चोक, रामेछाप र दोलखामा रहेका विभिन्न खनिज पर्दाथ अन्वेषण र उत्खनन गर्ने गरी बजेटमा व्यवस्था ल्याउन सुझाव दिए ।