आन्दोलनकारीसँग वार्ता गर्न कोशी प्रदेश सरकारले बनायाे वार्ता टोली

२४ जेठ, काठमाडौं । कोशी नामकरणसँग असन्तुष्ट रहेका पक्षहरुसँग संवाद  गर्न कोशी प्रदेश सरकारले वार्ता टोली गठन गरेको छ । आज बसेको मन्त्रिपरिषद बैठकले खानेपानी तथा सिञ्चाइमन्त्री तिलकुमार मेनाङवोको संयोजकत्वमा ३ सदस्यीय वार्ता टोली गठन गरेको सरकारका प्रवक्ता भक्ति सिटौलाले बताए ।

समितिको सदस्यहरूमा कृषिमन्त्री समेत रहेका सिटौला र सामाजिक विकास मन्त्री बुद्धि राजभण्डारी रहेका छन् । केहि दिनअगाडि सरकारले असन्तुष्ट पक्षलाई वार्ताका लागि आह्वान गरेको थियो । तर वार्ता टोली बनाएको थिएन । गत फागुन १७ गते प्रदेशको नाम कोशी राखिएपछि पहिचानवादीहरुले आन्दोलन जारी राखेका छन् । 

आन्दोनलका क्रममा आन्दोलनकारी पदमबहादुर लिम्बूको निधन भएको छ । उनलाई सरकारले शहीद घोषणा गरिसकेको छ । पहिचानवादीहरुले माग पूरा नभएसम्म आन्दोलन नरोकिने अडान राख्दै आएका छन् । यस अघि सरकारले वार्तामा आउन आह्वान गरेपनि वार्ता टोली गठन गर्न सकेको थिएन । पहिचानवादीहरुले भने सरकारले पत्र नपठाएसम्म वार्ताप्रति विश्वस्त हुन नसक्ने बताएका छन् ।