आन्तरिक उडानका लागि तीन वटा जहाज किन्न खोज्दा ममाथि घेराबन्दी सुरू भएको छः मन्त्री किराती

२५ जेठ, खोटाङ । संस्कृति, पर्यटन तथा नागरिक उड्डयनमन्त्री सुदन किरातीले मन्त्रालयले आन्तरिक उठाका लागि तीन वटा साना जहाज खरिद गर्ने प्रक्रिया अगाडी बढाउन खोज्दा कमिशन खोर भ्रष्ट समूहको सञ्जालले आफूलाई घेराबन्दीमा पारेको बताएका छन् ।

मन्त्री किरातीले जहाज किन्न नदिन आफूविरुद्ध स्वार्थ समूह घेराबन्दी सुरु गरेर पप्अप्ठ्यारोमा पार्न खोजेको बताएका छन् । बहिबार खोटाङको दिक्तेलबजारमा बनाइएको अग्नि नियन्त्रण यन्त्र उद्घाटनका क्रममा मन्त्री किराँतीले तीनवटा सानो जहाज किन्ने प्रक्रिया थालेपछि पानी मन भएका समूहले आफुलाई फाउने प्रयास स्वरुप घेराबन्दी सुरु गरेको बताए । 

उनले भने, ’हामी तीनवटा जहाज किन्ने प्रकृयामा छौँ । तर, हवाइजहाज किन्न नदिन संसारभरका पापी मनहरुले घेराबन्दी गरिरहेका छन्,’ मन्त्री किरातीले भने, ’तपाईहरुको साथ पाएँ भने प्रक्रिया र प्रणालीमा पारदर्शी तरिकाले पाँच पैसा घोटाला हुन नदिनेगरी जहाज ल्याउँछौँ ।’

किरातीले खरिद गरेर ल्याइने दुईवटा जहाज पश्चिम नेपालमा र एकवटा पूर्वी नेपालको विराटनगरमा राखेर उडान भर्ने व्यवस्था मिलाइने जानकारी दिए । जहाज अभावमा गौचरणमा परिणत भएका देशका २२ वटा विमानस्थलमा एकजना सुत्केरी भए पनि उडान भर्ने मन्त्री किरातीले बताए । 

मन्त्री किरातीले मन्त्रालय सम्हालेको करिब तीन महिनामै चार अर्ब ऋण घटाइएको चर्चा गरे । ’मन्त्री भएर जाँदा हवाइजहाज त बेहोस अवस्थामा भेन्टिलेटरमा सुतिरहेको रहेछ । त्यसलाई हामी उपचार गर्दैछौँ,’  उनले भने, ’२२ वटा एयरपोर्ट गौचरणमा परिणत भएको छ । कारण जहाजमाथि ठूलठूलो भ्रष्टाचार भए । पापीको आँखा लागे, लुट्नैसम्म लुटिए । खाने पिउने रमाउने ठाउँ भए ।’