रोजगारी दिने उद्योगलाई विद्युतमा सहुलियत दिनुपर्नेमा लिङ्देनको जोड

२५ जेठ, काठमाडौं । राष्ट्रिय प्रजातन्त्र पार्टी (राप्रपा) अध्यक्ष समेत रहेका सांसद राजेन्द्र लिङ्देनले देशभित्र रोजगारी दिने उद्योगलाई बिजुलीमा सहुलियत दिनुपर्नेमा जोड दिएका छन् । 

बिहीबार प्रतिनिधिसभाको बैठकमा आगामी आर्थिक वर्षको बजेटमाथिको छलफलका क्रममा सांसद लिङदेनले उत्पादित विद्युतको नेपालमै सदुपयोग गर्न उद्योगलाई सहुलियत दिने नीति बनाउनुपर्ने बताए । 
सहुलियत दिने नीतिले विद्युत् उपभोगमा सबैलाई प्रोत्साहित गर्ने र कालान्तरमा पेट्रोलियम पदार्थ आयात कटाैती गर्न महत्वपूर्ण पक्ष सावित हुने उनको भनाइ थियो । 

ठूला यातायातका विद्युतीय बसहरु ल्याउँदा भन्सारमा छुट र धेरै मात्रामा रोजगार दिने उद्योगहरुलाई बिजुली सहुलियत दिँदा बजेटले लिएको न्यूनतम् उद्देश्य भेटिने उनको भनाइ थियो । 

बजेटले जनसांख्यिक लाभ दिनेबारे ठोस कार्यक्रम ल्याउन नसकेको उनले बताए । ‘अहिले १५ देखि ५९ वर्षसम्मको मान्छेको संख्या ६२ प्रतिशत छ भनिन्छ । जनसंख्याको ११ प्रतिशत त आज वैदेशिक रोजगारीमा छ । बाँकी रहेकाहरु पनि बेरोजगार छन्’ उनले भने, ‘त्यो जनसंख्याको लाभ यो बजेटले कसरी दिन्छ ?’

वैदेशिक रोजगारका नयाँ गन्तव्य खोजी गर्ने कुरा बजेटमा राखेर देशका युवाहरुलाई विदेश पठाउने विषयलाई सरकारले बढवा दिएको बताए । युवालाई विदेश पठाएर देशकाे समृद्धि संभव नहुने उनले बताए ।

‘केही यस्ता क्षेत्रहरुपनि निर्धारण गरौँ, जहाँ कसैले रोजगारमूलक उद्योगहरू खोल्छ, हजारौँ मानिसलाई रोजगारी दिने उद्योगहरू खोल्छ भने उसलाई विद्युतमा सहुलियत दिने व्यवस्था गरौं’ उनले भने । उनले किसानलाई सिधा प्रभावित तुल्याउने रासायिक मल कारखाना खोल्नेबारे बजेट मौन बसेको भन्दै मल कारखाना खोल्ने बाटोमा अघि बढ्न सरकारलाई सुझाउ दिए ।