संसदमा एकीकृत समाजवादी र नाउपाको आक्रोशः ‘बजेट हुबहु पारित हुन दिँदैनौं’

२६ जेठ, काठमाडौं । शुक्रबार जारी प्रतिनिधिसभाको बैठकमा सत्तारुढ दल एकीकृत समाजवादी र नागरिक उन्मुक्ति पार्टी (नाउपा)का सांसदहरुले सरकारले ल्याएको आगामी आर्थिक वर्ष २०८०/८१ को बजेटप्रति आक्रोश पोखेका छन् । 

बैठकमा बजेटमाथ छलफलमा भाग लिएका एकीकृत समाजवादीका सांसद कृष्णकुमार श्रेष्ठ ‘किसन’ले सरकारले ल्याएको बजेटले तराईका जनतालाई अन्याय र विभेद गरेको भन्दै रोष व्यक्त गरे । उनले आफू सरकारको पक्षमा उभिनु पर्ने भएपनि संशोधन नभए बजेट जस्ताको तस्तै पारित हुन नदिने चेतावनी दिए । \

आजै मात्र एकीकृत समाजवादीका अध्यक्ष माधवकुमार नेपालले बजेट सुधार नभए विपक्षमा उभिने बताएका छन् । त्यसपछि सांसदमा बोलेका सोही दलका सांसद श्रेष्ठले आक्रोश पोखेका हुन् । 

उनले डडेल्धुरा, नुवाकोट र गोरखामा बजेटको ठूलो हिस्सा छुट्याएको कुरा आफूले सुनिरहेको भन्दै त्यसो भए विद्रोह हुने चेतावनी दिए ।

यस्तै नाउपाका सांसद लालबहादुर चौधरीले सरकारले ल्याएको बजेट बजेटले धेरै कुरा राम्रा समेटिएपनि तराई क्षेत्र र थारु समुदायको चाहना सम्बोधन नभएको भन्दै हुबहु रुपमा बजेटको पक्षमा उभिन नसक्ने बताए ।

उनले थारु समुदायमा लाग्ने सिकलसेल एनिमियाको उपचारका लागि ठोस कार्यक्रम समावेश गर्न अर्थमन्त्रीलाई सुझाव दिए । आफूहरुले उठाएका माग सम्बोधन नभए पारित गर्न सहयोग नगर्ने उनको भनाइ छ ।