संशाेधित नागरिकता ऐनको पक्षमा भएको धर्नामा जसपाका सांसद सहभागी

२६ जेठ, काठमाडौं । राष्ट्रपति रामचन्द्र पौडेलले जेठ १७ मा प्रमाणीकरण गरेको नेपालको नागरिकता (पहिलो संशोधन) विधेयक २०७९ को पक्षमा काठमाडौंको माइतीघर मण्डलामा शुक्रबार भएको धर्ना र प्रदर्शनमा जसपाका सांसद सहभागी भएका छन् । 

प्रमाणिकरणपछि नेपाल राजपत्रमा प्रकाशित भएर ऐन बनिसकेको अवस्थामा प्रमाणिकरणविरुद्ध परेको मुद्दामा सर्वोच्च अदालतले तत्काल कार्यान्वयन गर्न रोक लगाएको छ ।

प्रमाणिकरण प्रक्रियाले संविधानको उल्लंघन गरेको जनाउँदै वरिष्ठ अधिवक्ताद्वारा बालकृष्ण न्यौपाने र सुरेन्द्र भण्डारीले दायर गरेको मुद्दामा  सर्वोच्च अदालतले ऐन कार्यान्वयन नगर्न अल्पकालीन अन्तरिम आदेश दिएको हो । सो मुद्दामा आजै मात्र सर्वोच्चमा बसेको एक संयुक्त इजलासले प्रमाणिकरण भएको कागज मगाउने आदेश दिएको छ । 

ऐनबारेका मुद्दा अदालतमा विचराधीन रहेको अवस्थामा सडकमा प्रदर्शन भइरहेको छ । मण्डलामा जम्मा भएका प्रदर्शनकारीहरुले  ‘विधेयक कार्यान्वयन गर, आमाको नामबाट नागरिकता दे,’ जस्ता प्लेकार्ड बोकेका छन् । 

उक्त धर्नाप्रति ऐक्यबद्धता जनाउँदै जसपाका प्रमुख सचेतक प्रदीप यादव माइतीघर मण्डलामा पुगेका हुन् । प्रदर्शनकारीले एमाले र एमाले नेतृत्व तथा पूर्वराष्ट्रपतिविरुद्ध चर्का नारा लगाएका छन् ।