सुदूरपश्चिममा पनि उठ्याे प्रदेशको नाम परिवर्तनकाे आवाज, खप्तड थरुहट राख्रन माग

२८ जेठ, धनगढी । सत्ता साझेदार दल नागरिक उन्मुक्ति पार्टी (नाउपा)ले सुदूरपश्चिम प्रदेशको नाम पविर्तन गर्न माग गरेको छ ।

आइतबारको प्रदेश सभाको बैठकमा प्रदेश सरकारले ल्याएको अगामी आर्थिक वर्षको नीति तथा कार्यक्रमको छलफलमा भाग लिंदै नाउपाका प्रदेशसभा सदस्य लक्ष्मणकिशोर चौधरीले प्रदेशको नाम संशोधन गर्न माग गरेका छन् । 

प्रदेशसभाको लोगो संशोधनका लागि समिति गठन गरिएको विषयलाई स्वागत गर्दै लक्ष्रमण चौधरीले प्रदेशको नाम पनि सान्दर्भिक  नभएकाले संशोधन गर्दै खप्तड थरुहट प्रदेश राख्नुपर्ने माग गरेका हुन् । उनले लोगो मात्र नभई सुदूर शब्द राज्य, समुदाय र प्रदेशबाट समेत टाढा राखिएको भान हुने प्रदेशको नाम संशोधन गर्न माग गरे । 

उनले नाम सुदूरपश्चिमको सट्टा ‘खप्तड थरुहट’ राख्नुपर्ने बताए । लोगो सान्दर्भिक नभएको भन्दै प्रदेशसभा सदस्य पदमबहादुर शाहीको संयोजकत्वमा संशोधन समिति गठन गरिएको छ ।