देउवा निवास धुम्बाराहीमा नेताको गुनासो, तेस्रो पुस्ताका नेताले सुरु गरेको रूपान्तरण अभियान ठिक भएन

२८ जेठ, काठमाडौं । नेपाली कांग्रेसका सभापति शेरबहादुर देउवाले पार्टीका तेस्रो पुस्ताका नेताहरूले सुरु गरेको रुपान्तरण अभियानप्रति असन्तुष्टि जनाएका छन् । उनले केही नेताहरूले आफूखुसी रुपान्तरण अभियान कार्यक्रम सुरु गरेको तर यसले पार्टी र नेताहरू कै विरोध गरिरहेको भन्दै असन्तुष्टि जनाएका हुन् । रुपान्तरण अभियानबारे देउवा पक्षका नेताहरूले गरेको रिपोर्टिङका आधारमा देउवाले कार्यक्रम प्रति असहमति जनाएका हुन् । 
 
देउवा समूहका एक नेताले दिएको जानकारी अनुसार हरेक दिन बिहान प्रायः नेताहरूको धुम्बाराहीमा जमघट हुन्छ । कोही काम लिएर आउँछन् भने कोही देशभर भइरहेका पार्टीका गतिविधिका जानकारी दिन आउँछन् । कतिपय त भेटघाट र सभापतिको सन्चो बिसन्चो सोध्न पनि निवासमा आउने गरेका छन् । केही दिन यता देउवाको स्वास्थ्यमा पनि समस्या देखिँदै आएको छ ।  

नेताहरूले भेटघाटका समयमा केही केन्द्रीय सहस्यसहितका नेताहरूले सुरु गरेको कांग्रेस रुपान्तरण अभियानले सभापति देउवाको मात्र विरोध भइरहेको र यसलाई रोक्नुपर्ने र यसका लागि सभापतिले कदम चाल्नुपर्ने दवाव पनि दिने गरिएको छ । देउवाले भने रुपान्तरण अभियानबारे आफूले कसैलाई केही नभनेको र कसैले पनि कार्यक्रम गर्ने भनेर जानकारी नगराएको भन्दै पार्टीको नीति र निर्देशन विना भएको कार्यक्रम पार्टीको हुन नसक्ने बताउँदै आएका छन् । 

देउवालाई रुपान्तरण अभियानमा लागेका नेताहरूले कांग्रेसका कार्यक्रमभन्दा धेरै सभापति देउवाको मात्रै विरोध गरिरहेको र यस्ता कार्यक्रममा पार्टीको नराम्रो सन्देश गइरहेको भन्दै अभियानमा लागेकाहरूलाई कारबाही गर्न दवाव पनि दिइरहेका छन् । नेताहरूले अभियानको नकारात्मक चर्चा गरेपछि सभापति देउवाले प्रचार विभाग प्रमुख मीन विश्वकर्मासँग पनि यसबारे सोधेका थिए । 

विश्वकर्माले आफूलाई पनि कुनै नेताबाट कार्यक्रम भएको र गर्ने बारे जानकारी नदिएको भन्दै अहिले चलिरहेको रुपान्तरण अभियान पार्टी हितविपरित नै भइरहेको जानकारी गराएका थिए । केही नेताहरूले रुपान्तरण अभियान संस्थापन इतर पक्षका नेताहरूले चलाएको र सिंगो पार्टीको बदनाम भइरहेको भन्दै देउवा समक्ष असन्तुष्टि पोख्दै आएका छन् । पार्टीभित्र छलफल नगरी आन्तरिक असन्तुष्टि छताछुल्ल पारेर पार्टीलाई कमजोर बनाउन इतर समूहले अभियान चलाएको बुझाइ संस्थापन पक्षको छ । 

कांग्रेस रुपान्तरणका लागि भन्दै संस्थापन इतर पक्ष निकट नेताहरूले जेठ ११ गते मधेस प्रदेशको राजधानी जनकपुरबाट अभियान थालेका थिए । उनीहरूले प्रदेश स्तरमा कार्यक्रम चलाइरहेका छन् । रुपान्तरण अभियान कार्यक्रम गुट निरपेक्ष भएको उनीहरूको  दावी छ । अभियानमा देउवा समूह भनेर चिनिएका नेताहरू पनि सहभागी भइरहेका छन् । तर, केन्द्रमा भने यो अभियान सभापतिलाई कमजोर देखाउनका लागि मात्र गरिएको भन्दै धुम्बाराहीमा दिनहुँ चर्चा हुने गरेको छ ।   

नेताहरूले अभियान रोक्न भन्दै देउवालाई दवाव दिएपछि अभियानका गतिविधिलाई पार्टी सभापति शेरबहादुर देउवा स्वयंले विशेष निगरानी गरिरहेका छन् । पार्टी प्रचार विभाग प्रमुख तथा केन्द्रीय सदस्य मीन विश्वकर्माले इतर समूहनिकट नेताहरूले चलाइरहेको अभियानले पार्टीलाई नै कमजोर बनाउने काम गरेको जानकारी सभापतिलाई दिएका छन् । पार्टी नेतृत्वसँग परामर्श नै नगरी अभियानका नाममा पार्टीका कमजोरी ओकल्ने काम भइरहेको देउवा निकटस्थहरुको बुझाइ छ ।  

सुरुमा केन्द्रीय समितिमा नभएका नेताहरू लागेको र पछि केन्द्रीय सदस्यहरू पनि थपिएकाले संस्थापन पक्षका नेताहरूलाई अभियान टाउको दुखाइ भएको छ । अभियानले देशका विभिन्न ठाउँमा गएर पार्टी नेतृत्वमाथि अनावश्यक प्रश्न उठाइरहेको संस्थापन पक्षको भनाइ छ ।  यता,  अभियानमा लागेका नेताहरूले भने देशको राजनीतिमा उग्र वामपन्थी र दक्षिणपन्थी शक्तिहरूको उदय भएकाले अब कांग्रेसले आफ्नो इतिहासलाई साक्षी राखेर ’नयाँ कांग्रेस’ निर्माण गर्नुपर्ने आवश्यकताका साथ अभियान घोषणा गर्नुपरेको बताइरहेका छन् । 

अभियानमा संस्थापन इतर पक्षका नेताहरू रहेकाले यसमा वरिष्ठ नेता डा.शेखर कोइराला र महामन्त्री गगन थापाको हात रहेको संस्थापन पक्षको बुझाइ छ । तर, नेता कोइराला र महामन्त्री थापाले यस अभियानबारे कुनै प्रतिक्रिया दिएका छैनन् । महामन्त्री थापा पनि पार्टीमा आमुल परिवर्तनको आवश्यकता रहेको बताइरहेका छन । महामन्त्री थापाले नेतृत्व परिवर्तनको कुरा उठाएपछि सभापति देउवाले आफू अब सभापति नहुने भन्दै पार्टीमा परिवर्तन कुनै व्यक्तिको विरोध गरेर मात्र नहुने बताइरहेका छन् । तर, कांग्रेसका गतिविधि भने शुन्य छन् ।