४५ डिग्री तापक्रमले पनि रोक्न नसकेको रुपान्तरण अभियान !

३० जेठ, काठमाडौं । स्वास्थ्य मन्त्रालयले अहिले तापक्रम उच्च भएर 'लु' चल्न सक्ने भन्दै सर्वसाधारणलाई घर बाहिर ननिस्कन र घरभित्रै बसेर गर्मीबाट जोगिन भनिरहेको छ ।  काठमाडौंमा भन्दा तराईका जिल्लाहरूमा धेरै गर्मी छ । तर यतिखेर नेपाली कांग्रेसका युवा नेताहरू पैतालिस डिग्रीको बल्दो तापक्रममा पनि आफ्नो स्वास्थ्यको कुनै प्रवाह नगरी देशभर पार्टी रुपान्तरण अभियानमा सक्रिय छन् । 

कांग्रेस नेताहरू गुरुराज घिमिरे, मधु आचार्य, भुपेन्द्रजंग शाही, रञ्जित कर्ण, जगदीश्वरनरसिंह केसी, देवराज चालिसे, इन्द्र रिजाल, भरत खड्का, बिक्रम खनाल लगायतका नेताहरू यति बेला यो अभियानलाई अगाडि बढाइरहेका छन् । साथमा नरेन्द्र केरुङ, भूपेन्द्र थापा, धर्मेन्द्र नेम्वाङ, बिजुला बर्मा, विष्णुदेवी पाण्डे, रिता शाही, विक्रम खनाल, लक्ष्मी पाण्डे, सुवास लोहनी, नबिन श्रेष्ठ, तेजेन्द्र भटराईसहितका नेताको पनि सहभागिता निरन्तर छ ।  

मौसमको प्रतिकुलताबीच पनि यो अभियान चलाउने नेताहरू भन्छन्, जसरी तापक्रम बढेको छ त्यसै गरी हाम्रो मनमा पनि कांग्रेसलाई बदल्ने, परिवर्तन गर्ने र सुधार गर्ने मन ताप बढेको छ । कांग्रेसलाई रुपान्तरण गर्ने हामो मनमा आगो बलेको छ, हुटहुटी चलेको छ । बाहिरी तापक्रमले भन्दा हामीलाई कांग्रेस सुधार्नुपर्ने रापले बढी सेकेको छ । 

मुख्य गरी नेतृत्वको पार्टी सञ्चालन शैलीसँग असहमत हुँदै दवाव बढाउन र पार्टीलाई रुपान्तरण गर्न यो अभियान अगाडि बढाएको नेताहरू बताउँछन् । पार्टी रुपान्तरणका लागि बागमती, मधेश, गण्डकी, लुम्बिनी, कर्णाली र सुदूरपश्चिम प्रदेशमा अभियान सकाएको जानकारी अभियानकर्ता भुपेन्द्रजंग शाहीले नेपालबहसलाई दिए । अब यो अभियान कोशी प्रदेशमा केन्द्रित हुने शाही बताउँछन् । 

संरचना र शैली नबदल्ने हो भने पार्टी झन् कमजोर हुने र नयाँ दलको चुनौती सामना गर्न नसक्ने भन्दै पार्टी नेतृत्वलाई जानकारी गराएरै अभियान शुरू गरेको उनले बताए । तर, पार्टी नेतृत्वले भने उनीहरूको अभियानमाथि प्रश्न उठाएको छ ।  रुपान्तरण अभियानका अभियानकर्ता गुरुराज घिमिरे ६ वटा प्रदेशमा सकाइएको अभियानमा उत्साहपूर्ण सहभागिता देखिएको र थुप्रै समस्या पहिचान भएको बताउँछन् । 

उनले भने, ‘हामीले मुख्य गरी ६ प्रदेशको केन्द्रमा ठूला अन्तरक्रिया गर्यौं । यी कार्यक्रममा उत्साहजनक सहभागिता जनाउँदै कांग्रेस कार्यकर्ताले पार्टी नेतृत्व र पार्टी सरकारमा हुँदा भइरहेको कमजोरीलाई प्राथमिकताका साथ उठाउनुभएको छ । ठूलो पार्टी भएर सरकारमा सहभागी हुँदा समेत नतिजा नपाएका हामी तपाईँहरूका समस्या के छन् भनेर पुग्दा उत्साहपूर्वक प्रस्तुत भएका छन् ।’ त्यसपछि जिल्ला र स्थानीय तहसम्मै कार्यक्रम लिएर जाने उनीहरूको तयारी छ । 

अर्का अभियानकर्ता भुपेन्द्रजंग शाही सम्भावित चुनौतीलाई लिएर देशभर पुग्दा कार्यकर्ताले भावना पोख्न पाएको टिप्पणी गर्छन् । उनका अनुसार पार्टीका नेताको परम्परागत शैली, विवाद, गुटबन्दी देखेर कार्यकर्ता आजित भएका छन् । नयाँ दल चुनौतीको रूपमा उभिएको भनेर मुख्य सुझाव आएको उनको भनाइ छ । 

शाहीले भने, ‘पार्टीको कुनै कार्यक्रम नहुँदा हाम्रै रुपान्तरण कार्यक्रम पार्टीको अफिसियल कार्यक्रम जस्तो भएको छ । कार्यकर्ताले आक्रोश, भावना पोख्न पाएका रहेनछन् । हामीले हजारौँलाई मञ्च दियौं । आक्रोश र पोख्ने र भावना राखेर शान्त हुने मौका कार्यकर्ताले पाएका छन । ठूलो पार्टी भएर पनि सरकारले जनजीविकाका लागि प्रभावकारी काम गर्न नसकेको, पार्टीका संरचनाले प्रभावकारी कार्यसम्पादन गर्न नसकेकोमा मुख्य चिन्ता भएको पाएका छौं ।’

सात प्रदेशका ७ ठूला अन्तरक्रियामा एक ठाउँमा एक सय जना बढी सहभागीको गुनासो सुनेको र त्यसलाई लिपिबद्ध गरिएको शाहीले बताए । अभियान सकिएपछि सहभागीका गुनासा र पार्टी प्रतिका अपेक्षालाई प्रतिवेदन बनाएर पार्टी नेतृत्वलाई बुझाउने उनको भनाइ छ ।  अभियानका क्रममा पार्टी ठूलो भएको रमितामा बसेको तर नयाँ दलले चुनौती बढाएकोप्रति सजग नभएको पाइएको उनले बताए । 

अहिले कांग्रेस ठूलो पार्टी र सत्तामा भएजस्तो छ, तर भोलि कांग्रेस हार्ला कि भन्ने चिन्ता धेरैमा देखिएको उनले बताए । उनले कांग्रेसमा नेताहरू सुस्ताउँदै गर्दा चुनौती बनेर नयाँ दल उभिएको र समयमा सचेत नभए कांग्रेससँगै आफूहरु पनि डुब्ने बताए । कार्यकर्ताको भावना पनि पार्टी नसुध्रिए अवस्था अनुकूल छैन भन्ने नै छ, पार्टी नसुध्रिए २०८४ को चुनाव कांग्रेसका लागि कठिन हुने मत यो अभियानका क्रममा आफूहरूले प्राप्त गरेको उनको भनाइ छ । 

अभियानकर्ताहरुले धेरैले अब यसरी नचल्ने र अर्को महाधिवेशनमा आउन धेरै समय लाग्ने भएकोले विशेष महाधिवेशन गरेर जानुपर्छ भन्ने सुझाव पनि आएको बताएका छन् । पार्टीको संगठन सुधार्ने, संरचनालाई व्यवस्थित गर्ने, पार्टी सरकारमा हुँदा जनजीविकाका सवालमा राम्रो काम गर्नुपर्ने, भ्रातृ संस्थालाई चलायमान बनाउनुपर्ने मुख्य सुझाव उनीहरूको भनाइ छ ।