नयाँ स्टक र ब्रोकर लाईसेन्सबारे छलफल गर्न बोलाइयो धितोपत्र बोर्डलाई

३ असार, काठमाडौं । संसदको अर्थसमितिले नेपाल धितोपत्र बोर्डका पदाधिकारीहरुलाई नयाँ स्टक र ब्रोकर लाईसेन्सबारे छलफलका लागि बोलाएको छ । समितिले असार ५ गते बिहान ८ बजे बस्ने बैठकमा बोर्डका पदाधिकारीहरुसँग छलफल गर्न बोलाएको हो । 

 ‘नयाँ धितोपत्र दलाल र धितोपत्र व्यापार अनुमतिपत्र प्रदान गर्दा अपनाएका प्रक्रिया र मापदण्डबारे धितोपत्र बोर्डका पदाधिकारीहरुसँग छलफल’ गरिने कार्यसूची तय गरिएको छ । 

बोर्डले विभिन्न कम्पनीलाई लाइसेन्स दिने प्रक्रिया अन्तिम चरणमा पुर्याएको बेला छलफलमा बोलाइएको हो । लाइसेन्स वितरण प्रक्रियामा भ्रष्टाचार भएको र घराना वर्गको स्वार्थमा फाइदा पुग्ने गरी बोर्डले काम गरेको भन्दै लाईसेन्स दिने प्रक्रिया राेक्नुपर्ने कुरा संसद बैठकमा उठ्दै आइरहेको छ ।