यथास्थितिमा बजेटकाे समर्थन नगर्ने पक्षमा एकीकृत समाजवादीका बहुमत सांंसद

३ असार, काठमाडौं । सरकारले आगामी आर्थिक वर्ष २०८०/८१ को बजेटप्रति प्रतिपक्षी दलहरुको विरोध गरिरहेका बेला सत्ता पक्षकै सांसदहरुले समेत समर्थन गर्न नसक्ने बताएका छन् । सत्तारुढ दल नेकपा (एकीकृत समाजवादी)का उपाध्यक्ष समेत रहेका सांसद राजेन्द्रप्रसाद पाण्डेले यथास्थितिमा बजेटको पक्षमा मत दिन नसकिने बताएका छन् । 

आइतबार गाउँपालिका राष्ट्रिय महासंघले बजेटका बारेमा गरेको छलफल कार्यक्रममा बोल्दै पाण्डेले बजेट यथास्थितिमा पारित गर्ने भए आफ्नो पार्टी र सांसदहरू त्यसमा समर्थन गर्न नसक्ने प्रष्ट्याए । उनले पार्टीका अध्यक्ष माधवकुमार नेपालले समर्थन गर्न दबाब दिइरहेकोतर्फ संकेत गर्दै उनले ‘भोट हाले तपाईं एक्लै हाल्नुस्, हामी हाल्दैनौं’ भनेको खुलस्त गरे । 

उपाध्यक्ष पाण्डेले सरकारले कम्तीमा राष्ट्रिय गौरवका आयोजनामा बजेट निरन्तरता दिए मात्र पनि विचार गर्न सकिने बताउँदै त्यो अवस्था नरहेकाले समर्थन नगर्ने पक्षमा रहेको बताए । धादिङबाट निर्वाचित पाण्डेले धादिङ र गोरखाको सीमानामा बन्ने बुढी गण्डकी जलविद्युत आयोजनमा सरकारले बजेट कटौती गरेकामा आक्रोश व्यक्त गरे । 

बजेटमा विभेद गरेको र मन्त्री, प्रधानमन्त्री र पूर्वप्रधानमन्त्रीको जिल्लामा बजेट खन्याएको भन्दै सत्ता पक्षकै सांसदहरुले विरोध बजेट संशोधनको माग गर्दै आइरहेका छन् । पार्टीका बहुमत सांसद बजेटप्रति असन्तुष्ट रहेको बताए । एकीकृत समाजवादीसँग १० सांसद छन् ।