बाढी-पहिराेले ताप्लेजुङका ८२ विद्यालय बन्द, झण्डै ७ हजार विद्यार्थीकाे पढाई प्रभावित

७ असार, काठमाडौं । गएको शनिबार र आइतबार परेको भारवी वर्षापछि गएको बाढी र पहिरोका कारण ताप्लेजुङमा ८२ विद्यालय बन्द भएका छन् ।

पढाई पूर्णरुपमा प्रभावित भएको छ । बाढी र पहिरोले सडक, गोरेटो, पक्की पुल, झोलुङगे पुल बगाएका कारण विद्यार्थी आवतजावत माध्यम ठप्प हुन पुगेको हो । यसबाट विद्यालय बन्द अवस्थामा छन् । 

सिदिङ्वा र सिरिजङ्घा गाउँपालिकाका विद्यालय संचालनमा आउन सकेका छ्रैनन् । पहिरोका कारण कतिपय विद्यालय उच्च जोखिममा परेका छन् । 

पहिरोका कारण सिरिजङ्गा गाउँपालिका–८ आम्फुदीनका रहेको कञ्चजङ्घा माध्यमिक विद्यालय उच्च जोखिममा परेको छ । त्यहाँ अध्ययनरत एक सय २२ विद्यार्थीका पढाइ प्रभावित भएको छ । विद्यालयसँग जोडिएका सबै बाटो अवरुद्ध भएको छ । जोखिममा परेपछि विद्यालय अनिश्चितकालका लागि बन्द गरिएको छ । 

कञ्चजङ्घासहित सिरिजङ्घा गाउँपालिकामा संचालन रहेका ४२ वटा विद्यालय बाढीपहिराका कारणले अहिले गाउँपालिकाका सबै विद्यालय अनिश्चितकालका लागि बन्द भएको छ । यहाँ करिब ४ हजार विद्यार्थी अध्ययनरत छन् ।

यस्तै, सिदिङ्वा गाउँपालिकामा रहेका ३९ वटा विद्यालय पनि बन्द गरिएको छ । ति विद्यालयहरुमा रहेका ३ हजार एक सय विद्यार्थीहरुको पढाइ पूभावित भएको छ । वर्षाको क्रम नरोकिएको र पहिरो खस्ने तथा बाढी चल्ने क्रम जारी रहेपछि आगामी साउन ६ गतेसम्मका लागि विद्यालय बन्द गरिएको गाउँपालिकाका शिक्षा विभागले जनाएको छ । 

बाढी-पहिराेले ताप्लेजुङ, पाँचथर र संखुवासभामा गरी १० जनाको मृत्यु भएको छ भने २६ जना अझै हराइरहेका छन् । यस क्षेत्रका ४ पक्की पुल, २ झोलुङगे पुल बाढीले बगाएको छ भन् २ वटा झोलुङगे पुलमा क्षति पुगेको छ । मानिस आवतजावत गर्न नमिल्ने अवस्थामा छन् ।