बृहत शान्ति सम्झौताअनुरुप सेनाको संख्यामा पुनर्विचार आवश्यक : सांसद घर्ती

८ असार, काठमाडौं । माओवादी केन्द्रका सांसद पूर्णबहादुर घर्तीले नेपाली सेनाको संख्या पुनर्विचार गर्न आवश्यक रहेको बताएका छन् । शुक्रबार प्रतिनिधिसभाको बैठकमा जारी मन्त्रालयगत विनियोजन विधेयकमाथि धारणा राख्दै नेपाली सेनाको संख्या बृहत शान्ति सम्झौताअनुरुप परिमार्जन हुन आवश्यक रहेको बताए । 

‘मुलुकमा सशस्त्र द्वन्द्व हुनुअघि ५० हजारमा सेना थियो, द्वन्द्वका क्रममा ९० हजार पुर्याइयो’ उनले भने, ‘पछि बृहत शान्ति सम्झौतामा राष्ट्रिय सेनाको संख्या कटौती गर्ने भनिएको थियो, त्यो हुन सकेको छैन ।’ सेनाको स्तर वृद्धि गर्न र आधुनिक बनाउन ढिलाई गर्न नहुने बताए । 

उनले सशस्त्र प्रहरीलाई पूर्णरुपमा सीमा रक्षा सुरक्षामा खटाउनुपर्ने बताए । नेपाल प्रहरीलाई अपराध नियन्त्रणमा सशक्त बनाउन बजेट अभाव हुन नदिने बताए ।

यस्तै, सांसद घर्तीले सदन अनुशासन र मर्यादामा चल्न नसकेको बताए । उनले संसदीय व्यवस्थामा सदन बैठक र बैठकमा सहभागी सम्पूर्ण सांसदहरु ‘हाउस इन अर्डर’मा चल्न अनिवार्य रहने बताए । 

सदनमा प्रधानमन्त्रीले सांसदले उठाएका प्रश्नमा जवाफ दिने क्रममा दोहोरी चलाउने, प्रधानमन्त्रीले आफ्नो कुरा राख्दा पटकपटक राकिनुपर्ने अवस्थाले सदनको गरिमा मात्र नभई नियवमाली मिचेको बताए । नियमापत्ति जनाउँदा पनि नियमको दफा उल्लेख अनिवार्य हुने उनको भनाइ थियो ।